Ağdaşda ağır qəza: 4 nəfər yaralanıb, vəziyyətləri ağırdır
Ağdaş rayonunda 4 nəfərin ağır xəsarət alması ilə nəticələnən avtomobil qəzası baş verib.
1news.az-ın APA-ya istinadən verdiyi xəbərə görə, hadisə bu gün səhər saatlarında Bakı-Şamaxı-Yevlax avtomobil yolunun Ağdaşın Yenikənd kəndi ərazisindən keçən hissəsində olub.
“Mercedes” markalı minik avtomobilinin yoldan çıxaraq aşması nəticəsində 4 nəfər müxtəlif dərəcəli bədən xəsarətləri alıb.
Belə ki, yol-nəqliyyat hadisəsi zamanı Ağdaşın Qulbəndə kənd sakini, 1982-ci il təvəllüdlü Həsənov Tərlan Rafael oğlu, Ləki qəsəbə sakini, 1992-ci il təvəllüdlü İbadov Niyaməddin Əvəz oğlu, Orta Ləki kənd sakini, 1979-cu il təvəllüdlü Mustafayeva Rahilə Cəmil qızı, Yuxarı Ləki kənd sakini, 1940-cı il təvəllüdlü Musayev Cəmil Səməd oğlu müxtəlif dərəcəli bədən xəsarətləri ilə Ağdaş rayon Mərkəzi Xəstəxanasının reanimasiya şöbəsinə çatdırılıb. Onların vəziyyəti ağırdır.
Faktla bağlı Baş Dövlət Yol Polisi İdarəsinin istintaq və təhqiqat şöbəsi tərəfindən araşdırma aparılır.
Babək Cahandarov
