Elman Abdullayev: Artıq bir neçə beynəlxalq təşkilat və ölkə Ermənistanın bu qeyri-insani addımını qınayır
Efiopiyanın aparıcı yayım korporasiyası olan EBC-nin 104.7 FM radio dalğasında 4 iyul 2017-ci il tarixində Ermənistan silahlı qüvvələri tərəfindən Füzuli rayonunun Alxanlı kəndinin atəşə tutulması və bunun nəticəsində 2 yaşlı Zəhra Quliyeva və onun nənəsinin qətlə yetirilməsinə dair məlumat verilib.
1news.az-a XİN-in mətbuat xidmətindən verilən xəbərə görə, radionun xəbərlər proqramına müsahibə verən səfir Elman Abdullayev Ermənistan silahlı qüvvələrinin təxribatı nəticəsində mülki əhali və mülki obyektlərin atəşə tutulduğunu, nəticədə 2 mülki şəxsin qətlə yetirildiyi və daha bir mülki şəxsin ağır yaralandığını bildirib.
Beynəlxalq ictimaiyyəti, o cümlədən Afrika ölkələrini bu cür qəddarlıq və qeyri-insani akta biganə qalmamağa çağıran səfir E.Abdullayev, artıq bir neçə beynəlxalq təşkilatın və ölkənin Ermənistanı bu qeyri-insani addımına görə qınadığına dair məlumat verib.
E.Abdullayev xüsusi vurğulamışdır ki, BMT Təhlükəsizlik Şurasının qətnamələrinin tələblərini rəhbər tutaraq Ermənistan silahlı qüvvələrinin işğal olunmuş Azərbaycan torpaqlarından çıxarılması və Azərbaycanlı məcburi köçkünlərin doğma yurdlarına qaytarılması üçün beynəlxalq təşkilatlar və dünya dövlətləri səylərini əsirgəməməlidir.
Xatırladaq ki, iyulun 4-də saat 20:40 radələrində Ermənistan silahlı qüvvələri tərəfindən Füzuli rayonunun Alxanlı kəndi 82 və 120 millimetrlik minaatanlardan və dəzgahlı qumbaraatanlardan atəşə tutulub. Ermənistan tərəfinin bu təxribatı nəticəsində kənd sakinləri - 1966-cı il təvəllüdlü Allahverdiyeva Sahibə İdris qızı və onun nəvəsi, 2016-cı il təvəllüdü Quliyeva Zəhra Elnur qızı həlak olublar. 1965-ci il təvəllüdlü Quliyeva Səlminaz İltifat qızı isə yaralanıb.
Mövzu ilə əlaqədar oxuyun:
Baş Prokurorluq: Ermənistanın təxribatçı əməlləri ilə bağlı cinayət işi başlanıb
Füzuli sakinləri: Dinc əhalinin qətlə yetirilməsi vəhşilikdir – FOTO - VİDEO
S.Xankişiyeva
