Bəyanat: İnsanların məskunlaşdığı ərazilərə ballistik raket atılması beynəlxalq qanunların pozulmasıdır
Yəməndə Qanuni Hakimiyyətə Dəstək Koalisiyasının rəsmi sözçüsü polkovnik Türki əl-Malikini Husi silahlı qruplaşmasının Səudiyyə Ərəbistanı Krallığının paytaxtı tərəfə atdığı ballistik raketlə bağlı bəyanatla çıxış edib.
1news.az-a Səudiyyə Ərəbistanının Bakıdakı səfirliyindən daxil olan bəyanatda deyilir ki, bu gün (19 dekabr 2017-ci il) saat 13:39-da Koalisiyanın havadan müdafiə qüvvələri Yəmən ərazisindən Krallığın ərazisinə ballistik raket atıldığını müşahidə edib.
Türki əl-Maliki bildirib ki, raket paytaxt ər-Riyada tərəfə istiqamətlənib, dağınıq və kor-koranə formada atılaraq insanların məskunlaşdığı mülki bölgələri hədəf alıb:
"Patriot" bölüyü raketi ər-Riyad şəhərinin cənub tərəfində dəf edib, onun dəf olunması nəticəsində qəlpələri ətrafa səpələnməsi heç bir canlı tələfata səbəb olmayıb”.
Türki əl-Maliki əlavə edib ki, İranın Husi silahlı qruplaşması tərəfindən törədilən bu təcavüz və kor-koranə akt sübut edir ki, bu ölkə Husi silahlı qruplaşmasını üstün silahlarla dəstəkləməkdə davam edir. Bu fəaliyyətlər BMT Təhlükəsizlik Şurasının 2216 və 2231 saylı qərarlarının açıq-aşkar surətdə pozulmasıdır. Onun məqsədi Səudiyyə Ərəbistanı Krallığının təhlükəsizliyinə, eləcə də regional və beynəlxalq təhlükəsizliyə təhlükə yaratmaqdır. İnsanların məskunlaşdığı şəhər və kəndlərə ballistik raket atılması beynəlxalq humanitar qanunların pozulması hesab olunur.
Polkovnik beynəlxalq ictimaiyyəti, terrorçu və qanundankənar silahlı qruplaşmalara ballistik silah keçirən İranın kobud qanun pozuntularına qarşı ciddi addımlar atmağa, beynəlxalq norma və dəyərləri pozulmasına, regional və beynəlxalq təhlükəsizliyə təhlükə yaratmasına dəstək verənləri sorğu-suala çəkməyə çağırıb.
P.Sultanova
