Səfir: Cakartada Azərbaycan Mədəniyyət və Dil Mərkəzi fəaliyyətə başlayacaq
"2017-ci ildə Azərbaycan və İndoneziya arasında xüsusilə iqtisadi və mədəniyyət sahələrində əlaqələr əvvəlki illərlə müqayisədə daha da inkişaf edib".
1news.az xəbər verir ki, bunu İndoneziyanın Azərbaycandakı səfiri Hüsnan Bey Fanani deyib.
O bildirib ki, İl ərzində idxal və ixracata dair qeydə alınan statistik rəqəmlər bu inkişafın əsas göstəricisidir: “2015-2016-cı illərdə bu rəqəm 19 milyon təşkil edirdisə, cari ildə bu rəqəm 46 milyon dollara çatıb”.
Diplomat Azərbaycan və İndoneziya arasında əlaqələrin inkişafında azərbaycanlı gənclərin rolunu xüsusi qeyd edib. Onun sözlərinə görə, 2018-ci ildə İndoneziya Azərbaycanla əsasən təhsil və akademik sahələrdə əlaqələrin inkişafına çalışacaq. "Gələn il Cakartada Azərbaycan Mədəniyyət və Dil Mərkəzi fəaliyyətə başlayacaq. İndiyə kimi Bakıda iki dəfə İndoneziya Mədəniyyət Füstival keçirilib. Gələn ilin sentyabr-oktyabr aylarında Azərbaycanda növbəti İndoneziya Mədəniyyət Festivalı keçirməyi planlaşdırırıq. Eyni zamanda qarşılıqlı səfərlər, iş adamları arasında əməkdaşlıq, təqaüd proqramlarının həyata keçirilməsinə çalışacağıq".
P.Sultanova
