Azərbaycanlı kikboksinq üzə beşqat dünya çempionu titul kəməri uğrunda döyüşəcək – FOTO – VİDEO

Tanınmış azərbaycanlı kikboksçu Pərviz Abdullayev növbəti ACB KB turnirində çıxış etməyə hazırlaşır.

Beşqat dünya çempionu olan Abdullayev aprelin 20-də Moskvada çeçen idmançı İslam Baybatırova qarşı titul kəməri uğrunda döyüşə çıxacaq. Qalib gələcəyi təqdirdə Abdullayev altıncı dəfə dünyanın ən yaxşı peşəkar kikboksçusu adını qazanacaq.

Pərviz 1986-cı il yanvarın 5-də Ağdamda anadan olub. Təhsilini və hərbi xidmətini başa vurandan sonra özünü bütünlüklə kikboksinqə həsr edib. 2010-cu ildə ölkənin ən yaxşı idmançılarından biri seçilib, 2011-ci ildə prezident İlham Əliyevin adından mənzillə mükafatlandırılıb. 2017-ci ildə isə uşu üzrə VI İslam Həmrəyliyi Oyunlarının bürünc mükafatçısı olub.

“Qəbələ” idman klubunu təmsil edən Abdullayev Kamil Hüseynzadənin rəhbərlik etdiyi “Cobra” kikboks klubunda da məşq edir. Qeyd edək ki, Pərvizə peşəkar dəstək verən Kamil Hüseynzadə kikboksinq üzrə Azərbaycan Kubokunun sahibidir.

Eyni zamanda Azərbaycan Kikboksinq Federasiyasının prezidenti Adil Əliyev də Pərvizə hərtərəfli dəstək göstərir.

Qeyd edək ki, Pərviz Abdullayev bu günə kimi 52 döyüş keçirib ki, bu döyüşlərdən 23-ü nokautla başa çatmaqla 47 qələbə qazanıb.

2017-ci ilin noyabr ayında Los-Ancelesdəki ACB KB turnirində Azərbaycan kikboksçusu hollandiyalı döyüşçü Qodvin Afriye ilə reytinq döyüşü keçirərək qalib gəlib.

2018-ci il yanvarın 18-də isə Türkiyədə dünya və Avropa çempionu İsmayıl Uzuneri məğlub etməklə isə Pərviz Abdullayev peşəkar rinqdə növbəti qələbəsini qazandı.

Fəridə Rəsulova