“Heritage Foundation”un eksperti Ermənistandakı etirazlara dair Qərb mətbuatının susqunluğu barədə
Beynəlxalq siyasət sahəsində amerikalı ekspert, Amerikanın “Heritage Foundation” təşkilatının Beynəlxalq Araşdırmalar Mərkəzinin direktoru Lyuk Koffi Ermənistanda hazırkı hakimiyyətə qarşı keçirilən kütləvi etirazların nə Qərb mətbuatını, nə də rəsmi strukturları bir o qədər də maraqlandırmadığına diqqət edib.
“Ermənistanda ciddi etirazlar. Qərb mətbuatı maraq göstərmir. Hadisələr ciddi regional nəticələrə səbəb ola bilər. Müxalifətin əsas lideri Paşinyan həbs edilib. Hazırkı lider Sarkisyan hakimiyyətini birləşdirir. Əgər bunlar Azərbaycanda baş versəydi hüquq müdafiəsi ilə məşğul olan təşkilatlar bu barədə qışqırardılar. Ermənistana münasibətdə isə onlar susqunluq nümayiş etdirirlər”- deyə, L.Koffi “Tvitter” səhifəsində yazıb.
Artıq 10 gündür ki, İrəvanda kütləvi etiraz aksiyaları keçirilir: insanlar baş nazir Serj Sarkisyanın istefasını və növbədənkənar parlament seçkilərinin keçirilməsini tələb edirlər.
Son 10 il ərzində ölkəni idarə edən Sarkisyan səmərəsiz idarəetmədə və iqtisadi vəziyyətdəki ciddi pisləşmədə ittiham olunur. İnsanlar küçələrə axın edərək “Serj, get!”, “Addım at, Serji devir!”, “Azad, müstəqil Ermənistan!” kimi şüarlar səsləndirirlər.
“Mənim addımım” adlı etiraz hərəkatının lideri, Ermənistan parlamentinin deputatı Nikol Paşinyan bazar günü hazırkı baş nazir Serj Sarkisyanla görüşdən sonra həbs edilib.
Paşinyanla yanaşı müxalifətyönlü deputatlar Ararat Mirzoyan və Sasun Mikaelyan da saxlanılıblar.
Qeyd edək ki, Ermənistan polisinin yaydığı məlumata görə, bazar günü baş verən toqquşmalar zamanı 228 aksiya iştirakçısı saxlanılıb. Ümumilikdə saxlanılan şəxslərin sayı isə 280 nəfərdir.
1news.az
