Sarkisyan azərbaycanlı iştirakçıya: Qarabağ problemini həll etməyin vaxtı çatıb
Almaniyaya səfəri zamanı Ermənistan prezidenti Armen Sarkisyan Maqdeburqdakı Otto fon Qerik universitetini ziyarət edib, müəllim və tələbələrlə görüşüb.
1news.az "Armenpress"ə istinadla xəbər verir ki, Sarkisyan görüş iştirakçılarının suallarını cavablandırıb.
Azərbaycanlı iştirakçının sualına cavab verən Armen Sarkisyan bildirib:
"İnsan baxımından Ermənistan, Azərbaycan və Dağlıq Qarabağda baş verənlər faciədir. Mən tarixə qayıtmaq istəmirəm.
Ermənistanda yeni bir hökumət və yeni konstitusiya var. Mən dövlət başçısıyam, amma hökumət başçısı deyiləm. İndi Ermənistan Almaniyaya bənzəyir. Konstitusiyaya görə, İlham Əliyevlə danışıqlar hökumət başçısı tərəfindən aparılmalıdır. Mənim rolum məsləhət ola bilər.
Mən vacib bir şey vurğulamaq istəyirəm: insanlar yalnız Azərbaycanda deyil, Dağlıq Qarabağda və Ermənistanda da öldülər. Hesab edirəm ki, problemi həll etmək, ədalətli və dinc mühit yaratmaq üçün əlimizdən gələni etməliyik. Bunu etmək asan olacaqmı? Xeyr. Amma biz bunu bu gün etməyə çalışmalıyıq, əks halda, sizin və bizim uşaqlarımız bir neçə il sonra eyni sualı verəcəklər. Yəni problemi həll etməyin vaxtı çatıb”.
P.Sultanova
