Paşinyan Sankt-Peterburqda Lukaşenkodan "izahat" tələb edəcək
Ermənistanın baş naziri vəzifəsini icra edən Nikol Paşinyan Sankt Peterburqda Avrasiya İqtisadi İttifaqı ölkələri liderlərinin görüşündə Belarus prezidenti Aleksandr Lukaşenkonun Azərbaycan səfiri ilə görüşdə KTMT-yə dair verdiyi bəyanatlarla bağlı görüşmək niyyətindədir.
1news.az erməni mətbuatına istinadla xəbər verir ki, bunu Nikol Paşinyan jurnalistlərə deyib.
O, jurnalistlərin Lukaşenkodan izahat tələb edəcəyinə dair sualına belə cavab verib: “Əlbəttə, biz danışmalıyıq, uzada bilmərik”.
Xatırladaq ki, daha əvvəl Ermənistan XİN Belarus prezidenti Aleksandr Lukaşenkonun Azərbaycanın səfiri Lətif Qəndilovla görüşündə səsləndirdiyi bəyanatları qeyri-düzgün adlandırmışdı.
Lukaşenko Azərbaycan səfiri ilə görüşdə demişdi: “Nikol Paşinyan yalnız hökumətdəki vəziyyətlə məşğul olmalıdır. Ermənistan Aİİ və KTMT-yə rəhbərlik edir, bu, keçid dövründə olan ölkə üçün çox böyük bir yükdür. Ermənistan öhdəsindən gələcəkmi?”.
Belarus XİN-in də cavabı özünü çox gözlətmədi. XİN-in rəsmisi Anatoli Qlaz bununla bağlı deyib: "Görünür, o, (Nikol Paşinyan) özünü cəzalandırmaq və ya əfv etmək səlahiyyəti olan beynəlxalq prokuror kimi təsəvvür edir. Yəqin, cənab Paşinyan hələ "küçə demokratiyası" qaydalarının böyük siyasətdə qəbuledilməz olduğunu başa düşməyib. Təəssüf edirik. Ümid edirik ki, zamanla bu, qaydaya düşəcək ".
P.Sultanova
