"Parlaq Ermənistan": Qaz tariflərinin artması insanları küçələrə çıxaracaq

Ermənistanda qaz tarifinin artması sözsüz ki, vətəndaşlara zərbə vuracaq.

1news.az erməni mətbuatına istinadla xəbər verir ki, bunu  “Parlaq Ermənistan” partiyasının üzvü Qevorq Qorqisyan deyib.

Onun fikrincə, baş nazir vəzifəsini icra edən Nikol Paşinyanın qaz tarifinin artmasının Ermənistan vətəndaşlarının hiss etməyəcəyini söyləməsi doğru deyil, çünki əgər hökumət vətəndaşların əlavə xərclərini subsidiya etməyi qərara alsa, bu, dövlət büdcəsi hesabına həyata keçirilməlidir:

“Dövlət büdcəsində vətəndaşlar tərəfindən ödənilən vergilərdən başqa heç bir vasait yoxdur. Yəni, vətəndaşların  vergi şəklində dövlət büdcəsinə ödədikləri vəsait hansısa konkret məqsədlərin həyata keçirilməsinə xidmət etməlidir, ancaq hökumət buna getməyəcək, qaz xərclərini subsidiya edəcək ki, vətəndaşlar da tariflərin artmasını hiss edəcəklər”.

Qorqisyan burda başqa bir problemin olduğunu düşünür. Onun sözlərinə görə, hökumət mövcud qaz tariflərinin nə dərəcədə uyğun olduğunu nə qədər azaldılacağını araşdırmaldır:

“Mən əminəm ki, Ermənistanda qaz qiymətlərini hətta azaltmaq olar, vaxtında parlamentdə bu mövzuda müzakirələr aparılıb və nəticədə məsələnin nəzərdən keçirəcək xüsusi komissiya yaradıldı”.

O, istənilən halda  belə subsidiyalara qarşı olduğunu deyib, əlavə edib ki, bu, yalnız vətəndaşların rəyinə təsir etmək üçün bir "populizm vasitəsi"dir.

Qorqisyan mövcud qaz tariflərini absurd adlandırıb və tariflərin artmasının ölkədəki mürəkkəb sosial-iqtisadi vəziyyətə daha mənfi təsir göstərəcəyini vurğulayıb:

“Bu, qiymətlərə təsir edəcək və iqtisadiyyata zərbə vuracaq. Bundan əlavə, hökumət  vəziyyəti izləməli və əvvəl olduğu kimi məhsulların qiymətləri ilə spekulyasiyaya yol verməməlidir".

Qorqisyan, həmçinin əhali arasında etiraz əhavl-ruhiyyəsinin artmasını və bunun  əvvəllər olduğu kimi, etiraz aksiyalarının keçirilməsi şəklində özünü göstərə biləcəyini də istisna etməyib.

P.Sultanova