Məmmədyarovla Rəcəbov şahmat turunda Aronyanla oynayacaq
Şahmat üzrə "Grand Chess Tour"un təqvimi və iştirakçılarının siyahısı müəyyənləşib.
1news.az apasport.az-a istinadən bildirir ki, FİDE beş turniri əhatə edəcək turda 10 qrosmeysterin çıxış edəcəyini açıqlayıb.
İştirakçılardan ikisi Azərbaycan şahmatçısıdır. Bunlar Şəhriyar Məmmədyarovla (2770) Teymur Rəcəbovdur (2765). Yalnız ABŞ və Rusiya ölkəmizlə eyni sayda təmsilçiyə malikdir.
Fabiano Karuana (2823) və Uesli So (2770) şimali amerikalıları, Yan Nepomnyaşi (2789) ilə Aleksandr Qrişuk (2777) qonşularımızı təmsil edəcək. Turda Maksim Vaşye-Laqrav (Fransa, 2784), Dinq Liren (Çin, 2791), Aniş Giri (Niderland, 2764) və son turnirlərdə Teymurun "qapazaltı"sına çevrilən Levon Aronyan (Ermənistan, 2781) mübarizə aparacaq.
Şahmat turu həm klassik, həm də rapid və blitsi əhatə edəcək:
1. 3-15 iyun. Buxarest (Rumıniya). "Superbet Chess Classic"
2. 16-23 iyun. Paris (Fransa). "Paris Rapid & Blitz"
3. 5-12 iyul. Zaqreb (Xorvatiya). "Croatia Rapid & Blitz"
4. 9-16 avqust. Sent-Luis, Missuri (ABŞ). "St Louis Rapid & Blitz"
5. 16-28 avqust. Sent-Luis, Missuri (ABŞ). "Sinquefield Cup"
1news.az
