Paşinyan özünü təcrid etdi - Putinlə görüşmək üçün

Aprelin 7-də Moskvada Rusiya prezidenti Vladimir Putinlə Ermənistanın baş naziri Nikol Paşinyanın görüşü gözlənilir.

Ermənistan mediasında yer alan xəbərlərə görə, görüşdə "bir sıra ciddi, aktual və önəmli məsələlər müzakirə ediləcək".

Görüşlə bağlı məlumatı Ermənistan hökumətinin mətbuat xidmətinin rəhbəri Mane Gevorkyan da təsdiqləyib.

Moskvadakı görüşlə bağlı olaraq N.Paşinyan bu gündən etibarən özünütəcrid rejimində çalışmağa başlayıb.

"Şəxsi qəbullar və ictimai tədbirlər istisna olmaqla baş nazir planda nəzərdə tutulmuş rejimdə çalışır", - M.Gevorkyan söyləyib.

Martın 28-də N.Paşinyan iyunun 20-də ölkədə keçiriləcək növbədənkənar parlament seçkiləri ilə bağlı baş nazir postundan istefa verəcəyini bəyan edib. O, seçki gününədək baş nazir səlahiyyətlərini icra edəcəyini açıqlayıb.

Daha sonra, martın 30-da isə baş nazir aparatının rəhbəri Arsen Torosyan demişdi ki, Nikol Paşiyan 20 aprel-5 may arasında istefa verəcək.

Kreml isə Paşinyanın bu bəyanatının "təcili söhbət"i zəruri etmədiyini bildirib. Rusiya prezidenti V.Putinin mətbuat katibi Dmitri Peskovun dediyinə görə, "iki ölkə liderləri bu yaxınlarda danışıblar, təmaslar daimidir".

Noyabrın 9-dan 10-da keçən gecə Rusiya, Azərbaycan və Ermənistan arasında imzalanmış üçtərəfli bəyanatla 44 günlük İkinci Qarabağ Müharibəsinin başa çatmasından bəri Ermənistanda çox ağır siyasi, iqtisadi və maliyyə böhranı başlayıb. Ermənistan müxalifəti N.Paşinyanı Azərbaycan qarşısında kapitulyasiyada suçlayır.

Ölkədə kütləvi etiraz aksiyaları səngimir.

1news.az