“Prezidentin məhz 7 iyulda iqtisadi rayonların yeni bölgüsü ilə bağlı Fərman imzalaması ədalətin bərpası idi” – Cavid Osmanov
“Ölkə Prezidenti cənab İlham Əliyev tərəfindən imzalanan Fərmanla yeni iqtisadi zonaların formalaşdırılması zəruri bir addım idi”.
Bunu 1news.az-a açıqlamasında Milli Məclisin deputatı Cavid Osmanov deyib:
“Bu, işğaldan azad edilmiş ərazilərimizin, o cümlədən digər iqtisadi zonalara bölünmüş ərazilərimizin yeni inkişaf mərhələsini müəyyənləşdirən bir fərmandır. Heç şübhəsiz ki, Vətən müharibəsi bitəndən sonra, Azərbaycan parlaq qələbə qazandıqdan sonra cənab Prezidentimizin rəhbərliyi ilə işğaldan azad edilmiş ərazilərimizin uğurla inkişafı istiqamətində addımlar atılır. Kommunikasiya xətləri çəkilir, infrastruktur layihələri həyata keçirilir. Bildiyimiz kimi, Ağdam rayonunun baş planı təsdiqlənib, orada işlər başlanılıb. Bu, o deməkdir ki, bu ərazilər sürətlə inkişaf edəcək.
Digər bir tərəfdən Fərmanda öz əksini tapan Şərqi Zəngəzur iqtisadi zonası çox maraqla qarşılanıb. Bu da o deməkdir ki, bu ərazilər Azərbaycanın əzəli və tarixi torpaqlarıdır. İqtisadi rayonların bölgüsündə Xankəndinin, Xocalının və Xocavəndin adının əks olunması bir daha Ermənistanda bəzi qüvvələr, o cümlədən onların havadarları tərəfindən müəyyən spekulyativ söz-söhbətin qarşısını aldı və bir daha təsdiq etdi ki, bu torpaqlar Azərbaycanın tarixi torpaqlarıdır, yaxın zamanda həmin torpaqlarda da Azərbaycanın üçrəngli bayrağı dalğalanacaq, Azərbaycanın qanunları işləyəcək”.
C.Osmanov bildirib ki, birmənalı olaraq Prezident İlham Əliyev imzaladığı fərmanla 98 illik ədalətsizliyə son qoydu:
“1923-cü il 7 iyul tarixində ədalətsiz bir qərar verilərək Dağlıq Qarabağ Muxtar Vilayəti yaradılmışdı. Bilirik ki, Zəngəzur, hətta İrəvan Azərbaycanın torpaqları olub. Əlbəttə ki, biz indiki mərhələdə qonşu dövlətə qarşı hər hansı torpaq iddiası ilə çıxış etmirik, sadəcə məhz 7 iyul tarixində cənab Prezident tərəfindən Sərəncam imzalanması ədalətin bərpa olunması idi”.
