“Mövcud vəziyyət gələn ilədək davam edəcək” - Ekspert rəyi
“Neftin dünya bazar qiymətlərinin ardıcıl olaraq yüksəliş nümayiş etdirməsi, dünya ölkələrində koronavirusla bağlı pandemiyanın sovuşması ilə əlaqədardır”
Bunu 1news.az-a açıqlamasında iqtisadçı-ekspert Pərviz Heydərov bildirdi:
“Belə ki, vaksinləşdirmə prosesi artıq, nəticələrini göstərməkdədir. O mənada ki, bütün ölkələrdə məhdudiyyətlər aradan götürülür və buna müvafiq olaraq da cəmiyyətdə və iqtisadiyyatda bərpa prosesləri getdikcə sürətlənir. Bu da tələbatı artırır. Söhbət, bütün sahələrdəki tələbdən gedir”.
Son 2 ildə pandemiya ilə bağlı bütün sektorlar üzrə təklifdə fasilənin yarandığını deyən ekspert əlavə etdi ki, hasilat azaldıldı, istehsal dayandı, xidmət məhdudlaşdırıldı:
“Hazırda sürətlə artmaqda olan tələbatı təklif qarşılaya bilmir. Bu fonda ölkəmizə gəldikdə isə, bizim üçün mövcud vəziyyət həm əlverişlidir, həm də müəyyən istiqamətlər üzrə qeyri-qənaətbəxş.Əlverişlidir ona görə ki, neftin bahalaşması gəlirlərimizi artırır. Bu ilin yanvar-avqust aylarında Azərbaycan 8 milyard 498 milyon dollar dəyərində xam neft ixrac edib ki, hələ hasilatı azaltmışıq. Büdcədə neftin qiymətini 40 dollardan götürmüşük ki, dünya bazarlarında isə 80 dolları keçib. Bu isə o deməkdir ki, 200 faiz həddində gəlir götürürük. Qeyri-qənaətbəxşdir isə ona görədir ki, xam neftin bahalaşması hər şeyin qiymətini yüksəldir. Ərzaq və digər məhsullar da bahalaşır. Bu isə bizə təsir edir və inflyasiya idxal edir - daxildə istehsalı zəiflədir, onun genişlənməsi qarşısını alaraq boğur. Hesab edirəm ki, bu vəziyyət gələn ilədək davam edəcək”
Aytən Sakitqızı
