Şəhid Rəsul Sadıqovun xatirəsi anılıb – FOTO

Azərbaycanın ərazi bütövlüyünün təmin olunması uğrunda döyüş əməliyyatlarında iştirak edən şəhid əsgər Rəsul Sadıqovun xatirəsi Həzi Aslanov adına Ordu İdeoloji və Mədəniyyət Mərkəzində anılıb.

Müdafiə Nazirliyinin mətbuat xidmətindən 1news.az-a bildiriblər ki, şəhidin xatirəsinin anım mərasimində Müdafiə Nazirliyinin və ictimaiyyətin nümayəndələri, şəhidin ailə üzvləri, dostları, yaxınları iştirak ediblər.

Əvvəlcə xalqımızın ümummilli lideri Heydər Əliyevin, Azərbaycanın ərazi bütövlüyü və suverenliyi uğrunda şəhid olanların xatirəsi bir dəqiqəlik sükutla anılıb, Dövlət Himni səsləndirilib.

Tədbir iştirakçılarına R.Sadıqovun qısa ömür və şərəfli döyüş yollarına həsr olunmuş videoçarx nümayiş etdirilib.

Çıxış edənlər şəhidin tarixi ərazilərimizin işğaldan azad olunması zamanı döyüş tapşırıqlarını uğurla yerinə yetirməsindən, Vətən müharibəsində göstərdiyi şücaətdən, qorxmazlığından danışıblar.

Sonda Həzi Aslanov adına Ordu İdeoloji və Mədəniyyət Mərkəzinin solistlərinin ifasında vətənpərvərlik mövzusunda mahnılar səsləndirilib.