“İranın yürütdüyü siyasət regionda sülhə maneədir!” - Deputat hərbi təlimlərdən danışdı
“İranın son günlər Arazboyu ərazidə hərbi təlim keçməsi və ermənispərəst siyasətini açıq şəkildə biruzə verməsi ölkəmizdə böyük narahatlıq yaradıb”.
Bu sözləri 1news.az-a açıqlamasında Milli Məclisin deputatı Vüqar İskəndərov deyib:
“Cənab prezident öz çıxışında bu narahatlığı dilə gətirərək, lazımi cavabı verib. Sadəcə demək istəyirəm ki, müsəlman ölkəsinin digər müsəlman ölkəsinə qarşı bu hərəkəti qəbuledilməzdir. Bu gün Ermənistan hakimiyyətinin iyrənc əməlləri hamıya bəllidir. Xocalıda törədilən dəhşətləri, bacı-qardaşlarımızın, uşaqlarımızın başına gətirilən misli görünməmiş vəhşilikləri bütün dünya dövlətləri bilir, həmçinin İran da. Çox təəssüfedici məqamdır ki, müsəlman ölkəsi olan İran Azərbaycana qarşı xoflu siyasət yürüdür. Azərbaycanın isə heç bir ölkə ilə şəxsi qərəzlik nümayiş etdirəcək münasibəti yoxdur. Əksinə, ölkəmizdə hakimiyyətdən tutmuş sadə xalqın nümayəndələrinə kimi hər birimiz dostluq-qardaşlıq münasibətlərinin qorunub saxlanılmasına qarşı deyilik”.
Deputatın sözlərinə görə, digər dünya dövlətləri kimi İran da yaxşı bilir ki, Qarabağ Azərbaycandır!:
“44 günlük Vətən müharibəsində kimin kim olduğu bəlli oldu. Eləcə də İranın mövcud hərəkəti etməsi bizdə böyük narahatlıq doğurur. Xocalı kimi dəhşətli faciəni törətmiş olan Ermənistanın işğalçılıq siyasətini müsəlman ölkəsinin dəstəkləməsi böyük təəssüf doğurur. İranın yürütüdüyü siyasət regionda sülhə maneədir!”.
Aytən Sakitqızı
