Peru Konqresi Azərbaycanın müstəqilliyinin bərpası ilə əlaqədar bəyanat qəbul edib

Peru Konqresinin üzvü Xose Enrike Orenin təşəbbüsü ilə Konqres tərəfindən 18 oktyabr - Müstəqilliyin Bərpası Günü ilə bağlı bəyanat qəbul edilib.

Azərbaycanın Meksikadakı səfirliyindən 1news.az-a verilən məlumata görə, sənəddə 1918-ci ilin 28 may tarixində müsəlman Şərqində ilk parlamentli respublika olan Azərbaycan Demokratik Respublikasının yaradıldığı, iki il sonra isə ADR-in bolşevik işğalına məruz qaldığı, ancaq Azərbaycan xalqının öz tarixi dövlətçilik irsini unutmadığı və 1991-ci ildə ikinci dəfə müstəqillik əldə edərək özünü ADR-in varisi elan etdiyi bildirilir və bu ilin 18 oktyabrında “qardaş ölkə Azərbaycanın öz müstəqilliyinin bərpasının 30 illiyini qeyd etdiyi” söylənilir.

Bəyanatda Azərbaycanın 30 il ərzində öz müstəqilliyini və suverenliyini möhkəmləndirdiyi, habelə beynəlxalq aləmdə müxtəlif din və mədəniyyətlərin birgə yaşayışı üçün model ölkə kimi qəbul edildiyi qeyd olunur.

Sonda Azərbaycan xalqına müstəqilliyinin bərpasının 30-cu ildönümü münasibətilə səmimi təbrik ifadə edilir.