Deputat: “Regionda sülh istəyən dövlətlər Ermənistana açıq-aşkar təzyiq göstərməlidir”
“Ölkə başçısı bundan öncəki səfərlərində, Kəlbəcərdə, o cümlədən ötən gün baş tutan Laçın səfərində bir daha qeyd etdi ki, Ermənistan sülh istəmir”.
Bunu 1news.az-a açıqlamasında Milli Məclisin deputatı Aqil Məmmədov deyib.
“Bizim istəyimiz regionda sabitliyin təmin olunması, məsələlərin sülh yolu ilə həllidir. Amma təəssüf ki, Ermənistan təxribatları dayandırmır. Post-müharibə dövründə Ermənistan ikitərəfli razılaşmalara getsə də, üzərinə götürdüyü öhdəliklərə əməl etməyib. Sonuncu dəfə 12-14 sentyabrda yenidən genişmiqyaslı təxribat törətdilər. Azərbaycan Ordusu həmişəki kimi ayıq-sayıq oldu və düşmənin tutarlı cavabını verdi. Ermənistan indiyə qədər imzaladığı sənədləri heçə sayır, eyni zamanda vasitəçilik edən Avropa İttifaqının, Rusiyanın rəhbərlərinə hörmətsizlik göstərir. Ermənistan əməlləri ilə sübut edir ki, indiyə qədər aparılan danışıqlar əbəsdir”.
Deputatın sözlərinə görə, revanşist addımlardan əl çəkməyən rəsmi İrəvan daxilində təbliğatı davam etdirir.
“Üstəlik azyaşlı erməni uşaqlarını Azərbaycana nifrətlə böyüdürlər. Ermənilər havadarlarının fikirləri ilə oturub durur, müstəqil siyasət yeritmirlər. Buna baxmayaraq, regionda sülhün əldə olunmasını, kommunikasiyaların açılmasını arzulayan dövlətlər də var. Hesab edirəm ki, həmin dövlətlər Ermənistana açıq-aşkar təzyiq göstərməlidir. Ermənistan sülh sazişinə imza atmalı, Zəngəzur dəhlizinin açılmasına razılıq verməlidir. Başqa çıxış yolu yoxdur. Müharibə istəyirlərsə, böyük məğlubiyyətə düçar olacaqlar. Çünki onların hərbi və iqtisadi gücünü Azərbaycanla müqayisə etmək mümkün deyil. Böyük dövlətlər sonda öz sözünü deyəcək, Ermənistanı sülhə məcbur edəcəyik. Əgər məsələ həllini tapmazsa, sərhədlərimiz müəyyən edilmədiyinə və başqa çarəmiz olmadığına görə, yenə "Dəmir yumruq" öz sözünü deyəcək”.
Qeyd edək ki, Prezident İlham Əliyev sentyabrın 21-də Laçın şəhərində Azərbaycan Bayrağını ucaldıb. Daha sonra dövlət başçısı Laçın şəhərinin mərkəzi küçəsində ermənilərin törətdikləri dağıntılara baxıb, şəhərin ərazisini seyr edib.
