Məzahir Əfəndiyev: “Səfirliyimizə silahlı hücum törədənlər dərhal məsuliyyətə cəlb olunmalıdır”
“27 yanvar 2023-cü il tarixində Azərbaycan Respublikasının İran İslam Respublikasındakı səfirliyinə edilən silahlı hücum törədənlər dərhal məsuliyyətə cəlb olunmalı, sifarişçilər həbs olunmalı, bu kimi vəhşiliklərə son qoyulmalıdır”.
Bunu 1news.az-a açıqlamasında Milli Məclinin deputatı Məzahir Əfəndiyev deyib.
“18 aprel 1961-ci il tarixində qəbul olunmuş diplomatik əlaqələr haqqında Vyana Konvensiyasında müəyyən olunmuş müddəalara əsasən Azərbaycan Respublikasının səfirliyinin binasının və akkreditə olmuş əməkdaşlarının təhlükəsizliyini təmin etmək məhz İran dövlətinin üzərinə düşən öhdəlikdir. İnanıram ki, bu kimi vəhşiliyi və vandallığı törətmiş şəxslər, eləcə də onların himayədarları İran dövləti tərəfindən tezliklə rəsmən ifşa olunacaq, beynəlxalq hüquq və normalar çərçivəsində törədilmiş cinayət aktına münasibət bildiriləcək”.
“Hadisə nəticəsində dünyasını dəyişmiş diplomatik nümayəndəliyin mühafizə xidmətinin rəhbəri baş leytenant Orxan Əsgərova Allahdan rəhmət diləyir, yaralananlara, eləcə də zərərçəkmişlərə tezliklə sağalmalarını arzu edirik” – deyə, deputat əlavə edib.
Xatırladaq ki, bu gün səhər saatlarında Azərbaycanın Tehrandakı səfirliyinə silahlı hücum olub. Hadisə nəticəsində diplomatik nümayəndəliyin mühafizə xidmətinin rəhbəri baş leytenant Orxan Əsgərov dünyasını dəyişib, yaralananlar var.
