Elman Nəsirov: “AŞPA-dakı deputatların bir qisminin ya məşuqəsi, ya da həyat yoldaşı ermənidir”
“Avropa Şurası Parlament Assambleyası (AŞPA) Azərbaycan əleyhinə qətnamə qəbul etməklə əslində öz mahiyyətini ortaya qoydu”.
Bunu 1news.az-a açıqlamasında Milli Məclisin deputatı Elman Nəsirov deyib.
“Məlum oldu ki, bu təşkilatda Azərbaycanofobiya, islamofobiya, milli və etnik zəmində nifrət, ikili standartlar hakim mövqeyə malikdir. Bu təşkilatın 306 deputatından 90-ı bir yerə yığışıb 76-sı Azərbaycan əleyhinə qətnamə qəbul etdi. Azərbaycan nümayəndə heyətinin etibarnaməsini təsdiqləmədi və nümayəndə heyətimizi səsvermə hüququndan məhrum etdi. Burada bizim “günah”ımız nədir? Bizim “günah”ımız o olub ki, torpaqlarımızı işğaldan azad etmişik və seperatizmə son qoymuşuq.
Deputat qeyd edib ki, 1949-cu ildən fəaliyyət göstərən bu təşkilatın fəaliyyətinin ana prinsipi olan insan hüquq və azadlıqlarının müdafiəsidir.
“Və Azərbaycan 2001-ci ilin yanvarında bu təşkilata daxil olarkən əsas məqsəd bu idi. Ermənistanın işğalçılıq və etnik təmizləmə siyasəti nəticəsində 1 milyondan çox soydaşımız torpağından didərgin düşüb, qaçqın və məcburi köçkün statusuna düşüb, düşünürdük ki, bu təşkilat bizə kömək olar və Ermənistanla münasibətdə təsir mexanizmlərini işə salar, onların nümayəndə heyətinin səlahiyyətini təsdiqləməz. Amma bunların heç biri olmadı. Hesab edirəm ki, Fransanın Yelisey sarayından gələn təlimatlar və onların suflyorluğu əsasında AŞPA öz tarixinin qara ləkəsi ola biləcək bir addım atdı”.
E.Nəsirov Azərbaycana qarşı qərəzli münasibət göstərilməsini bu sözlərlə izah edib:
“Bu 76 deputatı araşdıranda məlum olur ki, onların bir qisminin ya məşuqəsi, ya həyat yoldaşı ermənidir, ya da birbaşa birbaşa erməni lobbisinə bağlı olan şəxslərdir. Bu prosesdə xüsusi canfəşanlıq edən alman deputatı Frank Şvabenin məşuqəsi, Frank Engelin isə həyat yoldaşı ermənidir. Çox təəssüf ki, bu gün belə böyük bir qlobal təşkilat öz maraqlarını kənara qoyub daima erməni maraqlarına xidmət edir, bu biabırçılıqdır. Hesab edirəm ki, beynəlxalq hüququn keşiyində dayanan dövlətlər heç bir zaman bu qədər aşağı səviyyəyə enməmişdi. Faktiki olaraq, AŞPA antiAzərbaycan qərarı ilə öz oturduğu ağacın budağını budadı. Yenidən öz imicini bərpa etmək, ləyaqətli bir qurum olaraq ortaya çıxmaq üçün AŞPA Azərbaycana xahiş etməlidir ki, onları qəbul etsin. Bundan sonra münasibətlərimizin gələcəyi ilə bağlı addımlar atılsın. Hesab edirəm ki, AŞPA-nın bu addımı ən bağışlanmaz səhvlərdən biri kimi tarixdə qalacaq”.
Xatırladaq ki, yanvarın 24-də Avropa Şurası Parlament Assambleyası Azərbaycan nümayəndə heyətinin etimadnaməsini təsdiqləməməyə səs verib. AŞPA-nın bu addımın ardından Azərbaycan Respublikasının Avropa Şurası Parlament Assambleyasındakı (AŞPA) nümayəndə heyəti yanvarın 24-də qurumun iclasında bəyanatla çıxış edib və bu qurumda iştirakını qeyri-müəyyən müddətə dayandırdığnı bildirib.
