“Həm Prezident seçkiləri, həm də parlament seçkiləri ilə Azərbaycan özünün yeni tarixinə start verib”

“Ölkədə keçirilən son iki seçkinin Azərbaycanın gələcək taleyi baxımından çox böyük əhəmiyyəti vardır”.

1news.az “Seçki 2024” Müstəqil Media Mərkəzinə istinadən xəbər verir ki, bunu “Müstəqil Mətbuat Mərkəzi” İctimai Birliyinin sədri Elçin Xalidbəyli deyib.

O xatırladıb ki, Azərbaycanda bu ilin fevral ayında keçirilmiş Prezident seçkiləri ölkənin müstəqillik tarixində ilk dəfə bütün ölkə ərazisində, bütün ölkə əhalisini tam əhatə etməklə keçirilib. Sentyabrın 1-də Milli Məclisə keçiriləcək seçkilər isə ilk belə parlament seçkiləri olacaq.

“Həm Prezident, həm də parlament seçkiləri ilə Azərbaycan özünün yeni tarixinə start verib. Əvvəl Prezident seçkiləri, daha sonra isə sentyabrın 1-də keçiriləcək parlament seçkiləri Azərbaycana daha irəli, strateji baxımdan yeni mərhələyə keçmək imkanı yaradacaq. Yeni formalaşacaq parlament Azərbaycanın inkişafına, ölkəmizin güclənməsinə öz töhfələrini verəcək. Eləcə də, yeni parlament vətəndaşların hüquqlarının tam təmin olunması istiqamətində mövqelərini gücləndirəcək”.

E.Xalidbəyli deyib ki, seçkilər prosesində media nümayəndələrinin üzərinə böyük məsuliyyət düşür.

“Media seçkiləri obyektiv şəkildə işıqlandırmalıdır. Seçki prosesində media nümayəndələrinin qanunvericiliyə uyğun olaraq rahat şəkildə faəliyyət göstərməsi üçün bütün imkanlar yaradılıb. Media nümayəndələri də bu məsuliyyəti işə diqqətli yanaşmalıdırlar”.