İcəvanda gərginlik: Osipyan etirazçılara güc tətbiq ediləcəyini bildirib

Ermənistan polisi zərurət yarandığı təqdirdə İcəvanda fiziki gücdən və xüsusi vasitələrdən istifadə edəcək.

1news.az  erməni mətbuatına istinadla xəbər verir ki,  bu barədə  Ermənistan polisinin rəisi Valeri Osipyan bildirib.

Qeyd edək ki, Ermənistanın Tavuş bölgəsinin İcəvan rayonunda vəziyyəti gərgin olaraq qalır. Belə ki, iyulun 17-də axşam saatlarında bir qrup Gürcüstan ərazisinə gedən dövlətlərarası əhəmiyyət kəsb edən yolu bağlayıblar. Nümayişçilər onlara əvvəllər olduğu kimi meşələrdən ağac kəsmək üçün icazə verilməsini tələb ediblər. Polis onları yoldan kənarlaşdırmağa çalışıb, lakin etirazçılar hüquq-mühafizə orqanları əməkdaşlarına daş atıblar.

Hazırda şəhərdə vəziyyətə Ermənistan polisinin rəhbəri şəxsən nəzarət edir. Osipyan qeyd edib ki, təhlükəsizlik qüvvələrinin səbrli davranışından sui-istifadəyə yol verməyəcək.

Onun sözlərinə görə, vətəndaşlar dünən polisin qanuni tələblərinə riayət etməyiblər və yolu bloklaylblar. Bundan sonra polis yolu açmaq üçün hərəkətə keçib: 

"Lakin onlar polisləri daş, polad çubuqlar və dubinkalarla qarşılayıblar, onlarla polis xəsarət alıb, xuliqanlıq və hakimiyyət nümayəndəsinə müqavimətə görə cinayət işi açılıb, indi 19 nəfər polis bölməsinə gətirilib. Polis günahkarların məsuliyyətə cəlb edilməsi işini davam etdirir".

Osipyan əlavə edib ki, uzun illər regionda qanunsuz olaraq meşələrdən ağaclar kəsilib, indi buna son qoymağın vaxtıdır: 

"Biz onların polislə belə bir tonda danışmasına icazə verməyəcəyik. Polisin  tolerantlığı zəiflik deyil, zəruri hallarda xüsusi avadanlıq da daxil olmaqla, fiziki güc tətbiq ediləcək".

Qeyd edək ki, dünən baş verən toqquşmalar nəticəsində hər iki tərəfdən yaralananlar var, 13 nəfər xəstəxanaya yerləşdirilib.

P.S.