Paşinyan Vanetsyanın istefasından danışdı: Bu, paqonları zibil qutusuna atmaq deməkdir
Ermənistanın baş naziri Nikol Paşinyan Los-Ancelsdə keçirdiyi mətbuat konfransında Milli Təhlükəsizlik Xidmətinin direktoru Artur Vanetsyanın istefasını şərh edib.
1news.az xəbər verir ki, Paşinyan Vanetsyanın öz postundan istefası ilə bağlı açıqlamasının Ermənistan silahlı qüvvələrinə hörmətsizlik olduğunu deyib.
"Bəyanatında cənab Vanetsyan zabit şərəfindən danışdı. Ancaq Milli Təhlükəsizlik Xidmətinin de-yure direktoru olaraq, əslində, Ali Baş komandanına qarşı bir bəyanat verir və zabit şərəfinə bundan artıq hörmətsiz münasibət ola bilməz", baş nazir əlavə edib.
Paşinyanın sözlərinə görə, o, bu açıqlamanın əvvəlcə MTX-nin saytında yerləşdirildiyindən xəbərsiz olub. O düşünüb ki, fərman imzalandıqdan sonra Vanetsyan açıqlama verib.
"Və zabit bunu etdi. Bunun nə demək olduğunu bilirsinizmi? Bu, paqonların zibil qutusuna atmaq deməkdir", Paşinyan vurğulayıb.
Əlavə edib ki, yeni Ermənistan hökuməti o hökumət deyil və Ermənistan belə bir halın baş verəcəyi ölkə deyil:
"Bu, Ermənistan Silahlı Qüvvələrinə hörmətsizlikdir. Mən çox şadam ki, erməni ictimaiyyəti bu hadisəyə çox dəqiq qiymət verdi".
Xatırladaq ki, sentyabrın 16-da Paşinyan Milli Təhlükəsizlik Xidmətinin direktoru Artur Vanetsyanın istefasını elan edib. Sentyabrın 19-da isə Ermənistan prezidenti MTX direktorunun birinci müavini Eduard Martirosyanı strukturun müvəqqəti rəhbəri təyin edilməsi haqqında sərəncam imzalayıb.
P.S.
