Polad Bülbüloğlu Avrasiya Xalqları Assambleyasının rəhbərliyi ilə görüşüb
Azərbaycanın Rusiyadakı səfiri Polad Bülbüloğlu “Avrasiya Xalqları Assambleyası” qeyri-hökumət təşkilatlarının beynəlxalq ittifaqının baş katibi Andrey Belyaninovu qəbul edib.
1news.az-a ölkəmizin Rusiyadakı səfirliyindən verilən məlumata görə, görüşdə həmçinin , Belyaninovujn birinci müavini - Avrasiya Xalqları Assambleyasının baş katibliyinin rəhbəri Svetlana Smirnova, müavini Mixail Fyodorov, Assambleyanın baş katibliyinin rəhbərinin layihə fəaliyyəti üzrə müavini Tatyana Fyodorova, beynəlxalq əməkdaşlıq üzrə müavini Yuliya Petrova və Assambleyanın beynəlxalq mədəniyyət əməkdaşlığı şurasının sədri Elmira Şerbakova iştirak edib.
Görüşdə rəhbərlik etdiyi təşkilatın fəaliyyəti, həyata keçirdikləri layihələr haqqında məlumat verən Andrey Belyaninov, 2019-cu ilin 29 sentyabr – 5 oktyabr tarixlərində Azərbaycan Respublikasında LİFFT-2019 IV Avrasiya ədəbiyyat festivalının təşkil olunacağını diqqətə çatdırıb.
Baş katib sözügedən tədbirin Heydər Əliyev Fondunun təşkilatçılığı ilə keçirildiyini vurğulayaraq, həmin ərəfədə ölkəmizdə daha bir tədbirin – Avrasiya Xalqları Assambleyası günlərini keçirmək istədiklərini bildirib və bu məsələdə Azərbaycan tərəfindən müvafiq köməklik göstərilməsini xahiş edib. O, oxşar tədbirlərin Monqolustan və Bolqarıstanda da keçirildiyini qeyd edib.
Səfir Polad Bülbüloğlu Assambleyanın fəaliyyətinə dair verilmiş ətraflı məlumata görə qarşı tərəfə təşəkkürünü ifadə edərək, səsləndirilən təklifin nəzərdən keçiriləcəyini deyib.
Həmçinin, görüş əsnasında regionda baş verən proseslər müzakirə olunub. Bu kontekstdə Polad Bülbüloğlu diqqəti son günlər Ermənistan rəhbərliyinin etdiyi məsuliyyətsiz bəyanatlarına çəkərək, onların danışıqlar prosesinə ciddi xələl gətirdiyini qonaqların diqqətinə çatdırıb.
Mixail Fyodorov təmsil etdiyi təşkilatın “Sülh və quruculuq naminə birgə qalib olduq” adlı layihəsi haqqında danışıb. Növbəti il İkinci Dünya müharibəsində qələbənin 75 illiyinin qeyd olunacağına toxunaraq, sözügedən müharibənin acı nəticələri, digər ölkələrlə yanaşı Çin, Monqolustan və Hindistanın verdiyi qurbanlara toxunub və sözügedən müharibə haqqında danışarkən bu ölkələrin yerləşdiyi coğrafiyanın unudulmamasının vacibliyini önə çəkib.
Azərbaycanın səfiri son dövrlər radikal milliyyətçiliyin təzahür etdiyini, faşizmin qəhrəmanlaşdırılması cəhdlərinin müşahidə olunduğunu bildirib və belə halların artmasından narahatlığını ifadə edərək, misal kimi Ermənistanda Qareqin Njdeyə abidənin ucaldılmasını göstərib. Bundan əlavə, Ermənistan dövlət rəsmilərinin açılış mərasimində iştirakı faktını önə çəkərək, belə halların olduqca təhlükəli olduğunu vurğulayıb və buna indiyədək lazımi reaksiyanın verilmədiyini təəssüflə qeyd edib.
Andrey Belyaninov İkinci dünya müharibəsi zamanı Sovet İttifaqı Qəhrəmanı adı almış kifayət qədər azərbaycanlının olduğunu bildirərək, onlardan birinin şərəfinə Bakıda abidənin ucaldılması fikrini irəli sürüb. Səfir Polad Bülbüloğlu təklifi müsbət qarşılayıb.
Görüşdə qarşılıqlı maraq kəsb edən digər məsələlər ətrafında da fikir mübadiləsi aparılıb.
P.S.