Qənirə Paşayeva Türkiyədə qalan tələbələrin ölkəyə gətirilməsindən danışdı
“Qardaş Türkiyə ilə bütün sahələrdə əməkdaşlığın genişləndirilməsi Azərbaycan prezidentinin siyasətinin əsas istiqamətlərindən biridir. Bu sənəd də həmin siyasətin həyata keçirilməsini təmin edir”.
1news.az-ın APA-ya istinadən məlumatına görə, bunu Milli Məclisin bu gün keçirilən iclasında millət vəkili Qənirə Paşayeva deyib.
O, Türkiyədə təhsil alan azərbaycanlı tələbələrin də müraciətini diqqətə çatdırıb: “İyunun 15-də Türkiyədə tədris yekunlaşır. Bu uşaqlar iyunun 15-də istər özəl, istərsə də dövlət yataqxanalarından çıxmağa məcbur olacaqlar. Təxminən 2400 nəfər qeydiyyatdan keçib və onların qayıtması zəruridir. Bu uşaqların iyunun 15-dən sonra harada qalacaqları bilinmir. Bu ailələrin əksəriyyəti uşaqlarının biletlərini almağa da razıdırlar. İyunun 15-nə qədər çarter reyslərlə bu uşaqların ölkəmizə geri qaytarılmasına şərait yaradılmalıdır. Aidiyyəti qurumlardan bu məsələni diqqətə almağa xahiş edirəm. Yataqxanadan artıq çıxarılma mərhələsində olan uşaqların ölkəyə gətirilməsi məsələsi öz həllini tapmalıdır”.
Millət vəkili Hikmət Babaoğlu isə bildirib ki, Avropa və digər ölkələrdən də tələbələrin ölkəmizə gətirilməsi məsələsi aktualdır: “Bu tələbələrin də ölkəmizə çarter reyslərlə gətirilməsi məsələsi öz həllini tapmalıdır”.
1news.az
