ru

Siyasət

7 İyul saat 16:43

Deputat: “Görülən işlərin son məqsədi Ermənistan tərəfindən işğal altında olan torpaqlarımızın azad edilməsidir”

Deputat: “Görülən işlərin son məqsədi Ermənistan tərəfindən işğal altında olan torpaqlarımızın azad edilməsidir”

“Cənab Prezident vaxtaşırı sadə vətəndaşlarla və yaxud hansısa bir kollektiv qarşısında çıxışında dövlətin apardığı siyasət, əldə olunan nəticələr, qarşıda duran işlərlə bağlı geniş çıxışlar edir”.

Bu barədə 1news.az-a Milli Məclisin deputatı Aydın Mirzəzadə Prezident İlham Əliyev iyulun 6-da Bakının Xətai rayonunda Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli hospitalı ilə tanışlıqdan sonra Azərbaycan Televiziyasına, İctimai Televiziyaya və “Xəzər” Televiziyasına müsahibəsində səsləndirdiyi fikirlərlə bağlı danışarkən deyib:

“Mən deyərdim ki, bu, liderin vətəndaşlar qarşısında məqbul hesabatıdır və çox maraqla qarşılanır. Yalnız Azərbaycanda deyil, Azərbaycandan kənarda da cənab Prezidentin çıxışları daima izlənir. Cənab Prezident hər zaman olduğu kimi ötən gün də bir sıra vacib məsələlərə toxunub. Önəmli məsələlərdən biri koronavirusla mübarizə məsələsidir. Koronavirus epidemiyası bütün dünyanı bürüyüb. Hər bir dövlət öz resurslarına və görüntüsünə görə bu xəstəliklə mübarizə aparır. Azərbaycan bu məsələdə artıq xeyli təcrübə toplayıb, aparılan siyasət Ümumdünya Səhiyyə Təşkilatı tərəfindən məqbul qarşılanır.

Vaxtilə Azərbaycanda cənab Prezidentin apardığı siyasət nəticəsində köhnə xəstəxanalar təmir edilməsəydi, yeni diaqnostik mərkəzlər inşa edilməsəydi, özəl klinikaların yaradılmasına şərait yaradılmasaydı bu gün Azərbaycan üçün çox çətin olardı. Əgər Azərbaycan vaxtilə hər bir manatının qorunması üçün dinc siyasət aparmasaydı yeni laboratoriyaların açılması, xəstələrin müalicə olunması üçün çətin vəziyyət yaranardı. Ancaq bütün bunların hamısı yoxdur, müalicə dövlətin hesabına gedir, vaxtilə 2 laboratoriya var idi, hazırda isə laboratoriyaların sayı 29-a çatır, daha 15 laboratoriyanın da açılması gözlənilir.Bu onu deməyə əsas verir ki, daha çox insan koronavirus testindən keçəcək.

Hər bir xəstə dövlətin diqqətindədir, artıq xəstə sayında müəyyən bir stabilliyə nail olunub. Hesab edirəm ki, test sayının çox olması onun daşıyıcısı olan və yaxud yeni xəstəliyə yoluxan insanların aşkar olunmasına şərait yaradıb. Hər halda ümid edirəm ki, karantin rejiminin tətbiqi, məhdudlaşdırıcı adımların atılması gündəlik yoluxmanın sayını xeyli azaltmağa və tədricən karantin rejimini ləğv etməyə imkan verəcək. Burada dövlətlə yanaşı vətəndaşın da üzərinə böyük məsuliyyət düşür. Mən özüm də evin tələbatı ilə bağlı gündəlik marketlərdə oluram, görürəm ki, insanlarımızın mütləq əksəriyyəti artıq maska taxır. Bu onu deməyə əsas verir ki, biz bu xəstəliyə mütləq qalib gələcəyik”.

Dövlət başçısının Dağlıq Qarabağ münaqişəsi ilə bağlı fikirlərinə münasibət bildirən deputat qeyd edib ki, Prezident İlham Əliyev Dağlıq Qarabağla mövqeyini hər zaman bildirir.

“Bu Azərbaycan cəmiyyətinin bir nömrəli ümummilli məsələsidir. Görülən bütün işlərin məqsədir Ermənistan tərəfindən işğal altında olan torpaqlarımızın azad edilməsidir. İqtisadiyyatın güclənməsi,müstəqil daxili, xarici siyasətin yeridilməsi, müasir silahlarla silahlanan güclü ordunun olması və s. bütün bunlar hamısı ona xidmət edir. Bütün beynəlxalq tribunalarda Azərbaycan Ermənistandan torpaqlarının işğalının dayandırılmasını tələb edir. 4 il bundan əvvəl aprel döyüşləri göstərdi ki, Azərbaycan öz ərazi bütövlüyünü təmin etməyə qadirdir. Heç təsadüfi deyik ki, cənab Prezident dünən  Ermənistana və Ermənistanı müdafiə edən xaricdəki bəzi dairələrə 2016-cı ildə keçirilən aprel döyüşlərini xatırlatdı. Birmənalı şəkildə bütün dünya bilməlidir ki, Azərbaycan mütləq işğalda olan torpaqlarını geri qaytaracaq. Bunun üçün əzmimiz var, gücümüz var düzgün aparılan siyasətimiz var və hakimiyyətin bu məsələdə mövqeyini müdafiə edən ictimai rəy var”.

Qafar Ağayev

BÖLMƏDƏ YENİ

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2020 "The First News", İnformasiya Agentliyi
Bütün hüquqlar qorunur