AMEA-da təşkil olunan sərgini uşaqlar ziyarət edib - FOTO
Azərbaycan Milli Elmlər Akademiyası (AMEA) elm və təhsilin inteqrasiyası istiqamətində tədbirlərini davam etdirir.
AMEA-nın 70 illik yubileyi çərçivəsində Əsas binada təşkil olunmuş sərgini paytaxtın 132-134 nömrəli təhsil kompleksinin direktoru Sara Xanlarova, məktəbin müəllim və şagird heyəti ziyarət edib.
AMEA-nın mətbuat xidmətindən verilən xəbərə əsasən, Akademiyanın 7 elmi bölməsinin tərkibinə daxil olan institut və təşkilatlar, regional elmi mərkəz və bölmələr, o cümlədən Rəyasət Heyətinin guşələrinə qoyulan eksponatlar şagirdlər tərəfindən maraqla qarşılanıb.
Bölmənin pavilyonunda təmsil olunan hər bir nümayəndə elmi müəssisənin strukturu ilə bağlı ətraflı məlumat verib, müəssisənin yaranma tarixindən danışıb. Sərgidə AMEA-nın elmi müəssisələrinin uzun illər əldə etdiyi nailiyyətlər, önəmli araşdırma nəticələri, elm sahələrinin müxtəlif tipli problemləri ilə əlaqədar aparılan tədqiqatlar, o cümlədən institut və təşkilatların fəaliyyətini əks etdirən azərbaycan, rus və ingilis dillərində bukletlər, kitablar və dəyərli nəşrlər barədə şagirdlərə məlumat verilib.
Elmin populyarlaşdırılması və şagirdlərin elmə marağının artırılması məqsədilə təşkil olunan tərbirdə sərginin rəhbəri, Beynəlxalq əlaqələr idarəsinin Beynəlxalq təşkilatlarla əlaqələr şöbəsinin rəisi, tarix üzrə fəlsəfə doktoru Nuridə Quliyeva bir müddət əvvəl Nobel mükafatı laureatı, professor Corc Ficerald Smut, Xəzər Strateji İnstitutunun (HASEN) baş katibi Haldun Yavaş, Türkiyə Elmlər Akademiyasının prezidenti, professor Əhməd Cavad Acar, Beynəlxalq Türk Akademiyasının prezidenti, professor Darhan Kıdıralı, həmçinin bir çox yerli, xarici qonaqların sərgini ziyarətini və qonaqların böyük marağına səbəb olduğunu vurğulayıb.
AMEA-nın Əsas binasında qurulan sərgi pavilyonları masaüstü eksponat, institut və ya təşkilatın fəaliyyət istiqamətlərini əks etdirən nəşrlər, əlyazma və tərcümələr toplusu, bitki nümunələri və digər məhsullardan ibarətdir. Eyni zamanda sərgidə şagirdlərə Akademiyanın əldə etdiyi mühüm elmi nəticələr və uğurlu yeniliklərdən bəhs olunub. AMEA-nın Təcrübə Sənaye Zavodunun məhsulları məktəb şagirdlərinə nümayiş etdirilib.
1news.az
