Səməd Seyidov: “Kris Smitin təklif etdiyi qanun layihəsinin qəbulu ehtimalı zəifdir”
“Elə təəssürat yaranır ki, ABŞ-ın siyasəti ermənipərəst qüvvələrin girovuna çevrilib, bu hal Vaşinqtonun maraqlarına mənfi təsir edir”.
1news.az-ın xəbərinə görə bu haqda parlamentin plenar iclasında Beynəlxalq münasibətlər və parlamentlərarası əlaqələr komitəsinin sədri Səməd Seyidov deyib.
Onun sözlərinə görə, bir sıra amerikalı siyasətçilər, o çümlədən, ABŞ-ın Helsinki Komissiyasının sədri Kris Smit Vaşinqton və Bakı arasında münasibətlərdə gərginlik yaratmağa çalışır.
“Kris Smit hazırladığı anti-Azərbaycan layihəsi vasitəsilə böyük təxribatların yaranması üçün əlindən gələni edir”-deyə S.Seyidov münasit bildirib.
Komitə sədri deyib ki, Avropa Şurası Parlament Assambleyasının yanvarda keçiriləcək qış sessiyasında Dağlıq Qarabağ və erməni işğalında olan digər ərazilərlə bağlı bir neçə sənəd müzakirə olunacaq.
"Bütün bunlar Azərbaycan nümayəndə heyətinin gördüyü işlər nəticəsində mümkün olub. Azərbaycan bu gün regionda sülh siyasətini əsas götürən önəmli dövlətlərdən biridir”-S.Seyidov söyləyib.
