“Türkvizyon 2015”-in qalibi müəyyən olundu
Türk dünyası İstanbulda ortaq mədəniyyət nümunələri olan “Türkvizyon 2015” mahnı müsabiqəsi üçün bir araya gəldi.
“Türk Müzik Birliyi” (TMB Tv) telekanalının təşkilatçılığı ilə Türkiyədə reallaşan 3-cü “Türkvizyon 2015” mahnı müsabiqəsində 21 ölkənin türk əsilli nümayəndələri iştirak edib.
Tədbirin rəsmi hissəsində Azərbaycanın millət vəkili Qənirə Paşayeva, müsabiqənin Baş Koordinatoru İslam Bağırov və digər rəsmi şəxslər, yarışmanın Türk dünyasının birliyi və mədəni dəyərlərinin təbliği baxımından əhəmiyyətindən bəhs ediblər.
Aşılış mərasimində çıxış edənlər “Türkvizyon” kimi mötəbər müsabiqənin ənənəyə çevrilməsindən məmnuniyyət bildirib və bunun davamlılığını arzulayıblar.
20-dən çox ölkədə 120 telekanal vasitəsilə canlı yayımlanan “Türkvizyon 2015”-in final mərhələsində 21 ölkədən olan türk əsilli təmsilçilər arasında gərgin mübarizə yaşanıb.
Jürinin ortaq qərarına görə Qırğızıstan təmsilçisi Jideş İdrisova “Türkvizyon 2015” qalibi olaraq birinci yerə sahiblənib.
Yarışmada 2 və 3-cü yerləri Qazaxıstan və Türkiyə bölüşüblər. Azərbaycanlı təmsilçi Mehman Tağıyev isə bu mübarizədə 7-ci yerdə qərarlaşıb.
Qardaşlıq və dostluq nümayiş olunan müsabiqədə Suriya Türkmənlərinin təmsilçisi olan Adil Şan “Gəliş” mahnısı ilə, eləcə də İraq Türkmənləri və Almaniya Türkləri jürinin özəl Sülh nominasiyalarına layiq görülüb.
Bundan başqa müsabiqə təşkilatçıları digər iştirakçıları da müxtəlif mükafatlarla təltif ediblər.
“Türkvizyon 2015”-in final mərhələsində bu il ilk dəfə reallaşdırılan “Bala Türkvizyon 2015”-in “Qızıl səs” mükafatçıları olan Qazaxıstan və Qırğızıstanlı balacalar səhnə alaraq təçkilatçılar və jüri tərəfindən xüsusi olaraq mükafatlandırılıblar.
Müsabiqənin yekununda iştirakçı və təşkilatçılar Türk dünyasının bu möhtəşəm ortaq mədəniyyət qələbəsini rəsmi ziyafətdə qeyd ediblər.
Xatırladaq ki, Türk əsilli soydaşlarımızın musiqi, ifa yarışı olaraq ortaq mədəniyyət nümunəmiz sayılan “Türkvizyon” beynəlxalq mahnı müsabiqəsi ilk dəfə 2013-cü ildə Türkiyədə Əskişəhərdə start götürüb, ikinci final isə 2014-cü ildə Tatarıstanın paytaxtı Kazan şəhərində keçirilmişdi.
1news.az
