İstanbulda terror aktı zamanı 11 nəfər həlak olub, yaralıların arasında Azərbaycan vətəndaşı var – FOTO - YENİLƏNMƏ

İstanbulda partlayış nəticəsində yaralıların arasında Azərbaycan vətəndaşı var, o Haseki xəstəxanasına yerləşdirilib.

1news.az Türkiyə KİV-nə istinadla verdiyi xəbərə görə, İstanbulun quvernatoru Vasip Şahin bəyan edib ki, terror aktı zamanı 11 nəfər həlak olub, bunlardan 7-i polis, 4 nəfəri isə sıravi vətəndaşdır.

Yaralıların sayı isə 36 nəfər çatıb, onlardan 3 nəfərin vəziyyəti ağır olaraq qiymətləndirilir. 

11:30

İstanbulda partlayış nəticəsində yaralananların sayı 18 nəfərə çatıb ki, bunların da 8-i polis əməkdaşıdır.

1news.az Türkiyə KİV-nə istinadla verdiyi xəbərə görə, yaralananlardan birinin vəziyyəti ağır kimi qiymətləndirilir.

Bütün yaralılar İstanbululun Haseki, Çapa, Samatya, Bezmi Alem xəstəxanalarına yerləşdirilib.

Rəsmi olaraq açıqlama verilməsə də, hadisə yerinə İstanbulun qubernatoru Vasip Şahin gəlib. Ola bilər ki, daha sonra o, bəyanatla çıxış etsin.

Hadisə ilə bağlı Bəyazit meydanına yaxın yerləşən İstanbul Universitetində imtahanların vaxtı dəyişdirilib. 

1news.az

11:02

İstanbulun Bəyazit meydanında güclü partlayış baş verib.

1news.az Türkiyə KİV-nə istinadla verdiyi xəbərə görə, partlayış avtobus dayanacağı yaxınlığında baş verib.

İlkin məlumatlara görə, 2 nəfər ölüb, 8 nəfər yaralanıb.

Ehtimala görə, terrorçular polis avtobusunu partladıb. Hadisə yerinə təcili yardım maşınları cəlb edilib.

Meydana gedən bütün yollar bağlanılıb.

1news.az