TQDK ali məktəblərə qəbul olunmaq istəyənlər üçün keçid ballarını açıqlayıb
Tələbə Qəbulu üzrə Dövlət Komissiyası (TQDK) 2016/2017-ci tədris ili üzrə Azərbaycanın ali təhsil müəssisələrinə qəbul olunmaq istəyən abituriyentlər üçün keçid ballarını açıqlayıb.
1news.az-ın AZƏRTAC-a istinadən verdiyi xəbərə görə, Dövlət İmtahan Mərkəzinin Direktorlar Şurasının sədri Məleykə Abbazsadə iyulun 15-də keçirilən mətbuat konfransında bu barədə məlumat verib. Bildirilib ki, hər bir qrup üzrə ixtisasların müsabiqəsində yalnız tələb olunan müsabiqə şərtlərini ödəmiş abituriyentlər iştirak edə bilərlər.
Qeyd edilib ki, 2016/2017-cı tədris ili üçün I, II, III və IV ixtisas qruplarının müsabiqəsində (ixtisas seçimində) ümumi balı 200-dən, hər bir imtahan fənni üzrə ayrılıqda topladığı nisbi balı 10-dan az olmayan abituriyentlər iştirak edə bilərlər: Ümumi balı 350 və daha çox olan abituriyentlərin müsabiqəyə buraxılmaları üçün onların fənlər üzrə cavablarına nisbi bal məhdudiyyəti tətbiq olunmur.
Birinci ixtisas qrupunun riyaziyyat, fizika, inşaat mühəndisliyi, informasiya texnologiyaları, elektronika, telekommunikasiya və radio texnika mühəndisliyi ixtisasları üzrə ümumi balı 250-dən, kompyuter elmləri, geologiya ixtisasları üzrə ümumi balı 300-dən və hər bir fənn üzrə ayrılıqda topladığı nisbi balı 10-dan az olmayanlar, V ixtisas qrupunda qabiliyyət imtahanı üzrə yekun nəticəsi və test imtahanında topladığı ümumi balı TQDK tərəfindən müəyyənləşdirilən tələblərə uyğun olanlar ixtisas seçimində iştirak edəcəklər.
Eyni zamanda, Azərbaycan Dillər Universitetinin tərcümə (dillər üzrə), beynəlxalq münasibətlər və regionşünaslıq (regionlar üzrə) ixtisaslarının müsabiqəsində xarici dil fənn üzrə nisbi balı 40-dan az olmayan abituriyentlər iştirak edə bilərlər. Bakı Dövlət Universitetinin I, II və III qruplarda tədrisi ingilis dilində olan ixtisasların müsabiqəsində attestatında xarici dil fənni kimi ingilis dili göstərilən və qəbul imtahanında ingilis dili fənni üzrə nisbi balı 60-dan az olmayanlar, IV qrupda tədrisi ingilis dilində olan ixtisasların müsabiqəsində isə ingilis dili fənni üzrə attestat qiymət “4” və “5” olan abituriyentlər iştirak edə bilərlər.
Aqromühəndislik, torpaqşünaslıq və aqrokimya, balıqçılıq və balıq təsərrüfatı işi, meşəçilik, aqronomluq, zootexniklik, baytarlıq, subioehtiyatları və akvabitkilər ixtisaslarına, həmçinin Azərbaycan Dövlət Aqrar Universitetinin meliorasiya və su təsərrüfatı tikintisi mühəndisliyi, ekologiya və əczaçılıq ixtisaslarının müsabiqəsinə ümumi balı 150-dən az olmayan abituriyentlər buraxılırlar. Bu zaman abituriyentlərin fənlər üzrə cavablarına nisbi bal məhdudiyyəti tətbiq olunmur.
Qeyd edək ki, ali məktəblərə I və IV qruplar üzrə qəbul imtahanı iyulun 15-də keçirilib, II və III qruplar üzrə qəbul imtahanı isə iyulun 25-də keçiriləcək. İxtisas seçimi qəbul imtahanları başa çatdıqdan sonra bütün ixtisas qrupları üzrə iyulun 30-dan avqustun 11-dək aparılacaq.
1news.az
