Binəli Yıldırım: “Bunlar hərbçi deyil, hərbçi qılığına girmiş terrorçulardır”

İyulun 16-sı yerli vaxtla saat 17:00-da Türkiyə parlamentinin föqəladə toplantısı başlayıb.

1news.az-ın verdiyi məlumata əsasən, toplantıda daha əvvəl dövlət çevrilişinə qarşı eyni mövqedən çıxış etmiş AKP, CHP, HDP və MHP partiyalarının təmsilçiləri iştirak edir.

Toplantı zamanı Türkiyənin baş naziri Binəli Yıldırım çıxış edib.

İlk növbədə baş nazir dünənki hadisələrdə həlak olanları dərin hüznlə anıb.

B.Yıldırım türk xalqı kimi qəhrəman və ulu xalqın övladı olduğundan qürur duyduğunu bildirib.

“Bizim xalq, millətin iradəsini, hakimiyyəti öz əlinə almaq istəyənlərə qarşı küçələrə çıxıb”, - deyə o bildirib.

Baş nazir Türkiyə prezidenti Rəcəp Tayip Ərdoğana sərgilədiyi qətiliyə görə təşəkkürünü bildirib.

“Dövlət çevrilişi təhlükəsi qarşısında dünyada nümunə olacaq qətiyyətli duruş sərgiləyən media nümayəndələrinə təşəkkür edirəm. Bayraqlarla küçələrə axışan vətəndaşlarıma minnətdaram. Dünən sizlər, qurulmuş barrikadları dağıdaraq parlament binasına gəldiniz, burada işıqları yandırdınız, qapıları açdınız. Parlament binası güllə-baran edilərkən geri addım atmadınız”, - deyə baş nazir qeyd edib.

Onun sözlərinə görə, Türkiyə tarixində keçmişdə baş vermiş çevrilişlər zamanı belə Parlament binasına hücum cəhdi olmayıb.

“Bunlar hərbçi deyillər. Bunlar hərbçi qılığına girmiş terrorçu, cinayətkardılar. Öz xalqına əl qaldıranın əli qırılar. Və 24 saat keçmədən onlar qırıldılar. Bu gün 79 milyon ürəyin birgə döyündüyü gündür. Bütün 81 vilayətimizdə AKP, HDP, MHP və CHP tərəfdarları eyni mövqedən çıxış etdilər. Bu ruhla biz terrora qalib gələcəyik və yaralarımızı sağaldacayıq”, - deyə B.Yıldırım əlaəv edib.

1news.az