Sərhəddən narkotik maddə keçirmək istəyən şəxs saxlanıldı

İrandan Azərbaycana narkotik maddə keçirmək istəyən şəxs saxlanılıb.

1news.az xəbər verir ki, bu barədə Dövlət Gömrük Komitəsindən məlumat veriblər.

Məlumata görə, Biləsuvar Gömrük İdarəsinin gömrük hüquqpozmalarına qarşı mübarizə şöbəsinə daxil olmuş əməliyyat məlumatı əsasında, idarənin “Qoşa Təpə”gömrük postunda İran İslam Respublikasından Azərbaycan Respublikasına piyada gələn Azərbaycan vətəndaşı saxlanılıb və üzərində şəxsi yoxlama aparılıb.

Yoxlama nəticəsində, saxlanılan şəxsin daxili orqanından (düz bağırsağından) 5 ədəd bükümdə, xalis çəkisi 167,512 qram olan narkotik vasitə - heroin aşkar edilib.

Vətəndaş izahatında bildirib ki, onun üzərində aşkar edilən narkotik vasitəni İranın Biləsuvar şəhərində Azərbaycandan olan digər şəxslə birlikdə əldə edib. Verilən əlamətlərə uyğun gələn həmin Azərbaycan vətəndaşı da İran İslam Respublikasından Azərbaycan Respublikasına piyada gələrkən “Qoşa Təpə” gömrük postunda saxlanılıb.

Faktla bağlı araşdırma aparılır.

1news.az