İstanbulda Asiya və Avropanı birləşdirən “Avrasiya” tunelinin açılışı olub

İstanbulda Asiya və Avropa qitələrini dənizin altından avtomobil yolu ilə birləşdirən Avrasiya Tunelinin açılışı olub.

Açılış mərasimində dövlət və hökumət nümayəndələri, eləcə də xarici ölkələri təmsil edən çox sayda rəsmi təmsilçi, Türkiyə ictimaiyyətinin görkəmli şəxsləri iştirak edib.

Mərasimdə Azərbaycanı nəqliyyat naziri Ziya Məmmədov təmsil edib.

Rəsmi açılışda Türkiyə Prezidenti Rəcəb Tayyib Ərdoğan, Türkiyə Böyük Millət Mərkəzinin sədri İsmayıl Kahraman, Baş nazir Binəli Yıldırımın çıxışları dinlənilib.

Çıxışlarda Avrasiya tunelinin əhəmiyyəti, Türkiyədə perspektivdə olan digər layihələr, o cümlədən gündəlikdə olan siyasi məsələlərdən danışılıb.

Məlumat verilib ki, İstanbulun nəqliyyat problemini köklü həll edəcək tunelin istifadəyə verilməsi ilə iki qitə arasındakı məsafəni avtomobil ilə 15 dəqiqəyə qət etmək mümkün olacaq. Dənizin 106 metr dərinliyində tikilən Avrasiya Tuneli ikimərtəbəli yol ilə avtomobillərin hərəkəti üçün nəzərdə tutulub. Layihənin ümumi uzunluğu 14,6 kilometrdir. 5,4 kilometrlik hissəsi isə dənizin altına xüsusi texnologiya ilə inşa edilən ikimərtəbəli tuneldən ibarətdir.

Anadolu