Mərkəzi Bankda yeni formatda hərrac keçirilib: manat ucuzlaşıb
Yanvarın 12-də Mərkəzi Bankda Dövlət Neft Fondunun da iştirakı ilə yeni formatda hərrac keçirilib.
1news.az-a Mərkəzi Bankdan verilən xəbərə görə, hərrac birtərəfli valyuta satışı formasında və rəqabətli qaydada keçirilib və sifarişlər ən yüksək qiymətdən ən aşağı qiymətə doğru təmin edilib. Hərracda manatın orta çəkili məzənnəsi 1.7867 səviyyəsində formalaşıb.
Yanvarın 12-də manatın dollara qarşı məzənnəsi 1,7742 AZN/USD səviyyəsində müəyyənləşib.
Beləliklə, hərrac zamanı manat ABŞ dollarına nisbətdə 0,0125 manat və ya 0,7045% ucuzlaşıb.
Xatırladaq ki, ötən gün AMB-nin sədri elman Rüstəmovun rəhbərliyi ilə keçirilən görüşdə banklar valyuta mübadilə əməliyyatlarının aparılması zamanı müəyyən olunmuş faiz dəhlizi, yəni marja (hazırda -/+4%) ləğv olunacağı qeyd edilib.
Bu tədbirlər AMB tərəfindən məzənnə rejiminə keçid çərçivəsində həyata keçəcək.
1news.az