ABŞ-da məhkəmə prezidentin miqrasiya fərmanının icrasını dayandırıb

ABŞ-ın Siettl federal məhkəməsi prezident Donald Trampın miqrasiya siyasətini sərtləşdirən fərmanının icrasını müvəqqəti təxirə salıb.

1news.az APA-ya istinadən xəbər verir ki, qərar Vaşinqton və Minnesota ştatları tərəfindən qaldırılan iddia əsasında hakim Ceyms Robart tərəfindən qəbul olunub.

Bütün ölkə ərazisində qüvvədə olan məhkəmə qərarı ABŞ hökumətinə yeni fərmanın şamil olunduğu şəxslərin deportasiyasını qadağan edir.

ABŞ Ədliyyə Nazirliyi qərardan protest verəcəyini açıqlayıb.

Bundan əvvəl Nyu York federal hakimi də bənzər qərar qəbul etmişdi.

Qeyd edək ki,  D.Tramp ötən həftə İraq, İran, Suriya, Sudan, Yəmən. Liviya və Somali vətəndaşlarının 90 gün ərzində ABŞ-a daxil olmasının qadağan edilməsi barədə fərman imzalayıb. Bundan əlavə, D. Tramp qaçqınların ABŞ-da yerləşdirilməsi barədə proqramı 120 gün müddətində dayandırıb.

1news.az