Mübariz Əhmədoğlu: Ermənistan ordusunun Azərbaycan ərazisindəki mövcudluğu erməni ölümlərinin əsas mənbəyidir
Prezident S.Sərkisyan “Ermənistan” telekanalına müsahibəsində Dağlıq Qarabağ tənzimlənməsində Ermənistanın yeni mövqeyini açıqladı: Qoşunların təmas xəttində itkilər istisna edilməlidir. Yalnız bu müəyyən etimad mühiti yarada bilər.
1news.az xəbər verir ki, bunu Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu deyib. Onu sözlərinə görə, Azərbaycan ərazisində Ermənistanın işğalçı ordusunda baş vermiş ölümlərin statistikasının təhlili ortalığa maraqlı nəticələr qoyur:
ı. 2017-ci ilin on ayı ərzində Ermənistan ordusunda 56-60 arası ölüm halı baş verib. Bunlardan yalnız 12-si və ya 15-ini Azərbaycan hərbçiləri öldürüblər. Qalan 41-44 nəfər qeyri-döyüş itkisidir. Ermənistan ordusunda baş verən nizamnamədən kənar hərəkətlər və kriminallıq Azərbaycan ordusunun öldürdüyündən təxminən 4 dəfə çox erməni öldürüb.
ıı. Həmin ölümlərə görə 10 nəfər erməni hərbçiləri həbsdədirlər. Bu 10 nəfəri də itkilər siyahısına əlavə etsək, statistika daha dəhşətli alınır.
ııı. İşğalçı Ermənistan ordusunda son ölüm hadisəsi olan N.Adibekyanın xidmət yoldaşı tərəfindən öldürülməsi bütövlükdə erməni cəmiyyətinin daxilində mənəviyyatsızlıq və sivilizasiya uçurumunun olduğunu göstərir. Tərcümeyi-halından N.Adıbekyanın “küçə uşağı” olmadığı bəlli olur; RF vətəndaşıdır, Rusiyada hərbi xidmətini çəkib. Ermənistana isə ali təhsil almağa gəlibmiş. Dərhal orduya aparıblar və öldürülüb.
M.Əhmədoğlunun sözlərinə görə, S.Sərkisyan beynəlxalq ictimaiyyəti inandırmaq istəyir ki, belə orduda itkilər olmayacaq.
Bunu nonsens adlandıran politoloq bildirib ki, hər il buna bənzər statistika var. Gələcəkdə statistika daha da pisləşəcək.
O, işğalçı Ermənistan ordusunda baş verənlər fonunda prezident S.Sərkisyanın dediklərindən çıxan nəticələri aşağıdakı kimi dəyərləndirib:
ı. S.Sərkisyan işğalçı Ermənistan ordusunda ölümlərdə maraqlıdır, ermənilərin ölümü Ermənistan ordusunun Azərbaycan ərazisində qalmasının əsas səbəbidir.
ıı. S.Sərkisyan yalnız bu qaydada özünün hakimiyyətini uzada bilər. Hər halda on illik prezidentliyi dövründə S.Sərkisyan görünür, daha bir rekord vurmaq istəyir. Onun prezidentliyi dövründə Ermənistanı tərk edənlərin sayı və Ermənistanın xarici borcu tarixi maksimumdadır. Ermənistan ordusu qeyri-döyüş itkilərinə görə də tarixi maksimumu əldə edə bilər.
1news.az
