Səudiyyə Ərəbistanında korrupsiya şübhəsi ilə həbs olunanlar azad edilib

Səudiyyə Ərəbistanında korrupsiyaya qarşı mübarizə çərçivəsində həbs olunan şahzadələr, sabiq nazirlər və sahibkarlar “Ritz Carlton” otelini tərk edib.

1news.az  xəbər verir ki, son günlər şahzadə Əl-Valid bin Tələl, MBC media holdinqinin sahibi Əl-Valid əl-İbrahim, həmçinin “Saudi Binladin Group” tikinti holdinqinin başçısı Bəkr bin Laden həbsdən azad olunub.

Yanvarın 24-də Ər-Riyad krallığın onlarla yüksək vəzifəli məmurunun adının hallandığı korrupsiya üzrə araşdırmanın başa çatdığını bəyan edib. Həbs olunanların əksəriyyətinin məhkəməyə qədər nizamlanma prosesinə razılıq verdiyi bildirilir. 95 şübhəlinin işi isə məhkəməyə təqdim olunub. Hökumətlə sövdələşməyə razı olmayanların hara göndərildiyi barədə məlumat yoxdur.

Xatırladaq ki, ötən il noyabrın 5-də Səudiyyə Ərəbistanında korrupsiyaya qarşı kampaniya çərçivəsində hakim ailəyə mənsub 11 şahzadə, həmçinin çox sayda sabiq nazir, məmur və biznesmen saxlanılmışdı. Yerli KİV-lərin məlumatına əsasən, korrupsiyada ittiham olunan yüksək vəzifəli məmurların əksəriyyəti iddiaların tənzimlənməsi üçün xəzinəyə 100 milyard dolara yaxın vəsait ödəməyə razılıq verib.

1news.az