“Ford” 560 mindən çox avtomobili geri çağırır
ABŞ-ın avtomobil istehsalçısı “Ford” və Çinin “Changan” şirkətinin birgə müəssisəsində yığılmış 560 mindən çox avtomobil əyləc sistemindəki qüsurlara görə geri çağırılır.
1news.az-ın AZƏRTAC-a istinadla verdiyi xəbərə görə, Çinin Keyfiyyətə Nəzarət, Təftiş və Karantin Baş Administrasiyasının qərarına əsasən, 2013-2016-cı illərdə istehsal olunmuş təxminən 370 min “Mondeo” modeli və 2014-2017-ci illərdə buraxılan 200 min “Edge” modeli geri çağırılacaq.
Administrasiyanın mütəxəssisləri hesab edirlər ki, həmin avtomobillərin əyləc şlanqının materialları möhkəm deyil və bu, ekstremal şəraitdə təhlükə yarada bilər.
Fevralın 25-də başlayacaq geriçağırma prosesində bütün qüsurlu hissələr “Changan Ford” birgə müəssisəsinin hesabına dəyişdiriləcək.
S.Xankişiyeva
