Səfir: “Kəşmir bizim üçün Dağlıq Qarabağdır”
Hər il 5 fevral tarixi Pakistanda Kəşmirlə həmrəylik günü kimi qeyd edilir.
1news.az xəbər verir ki, bu münasibətlə Pakistanın Azərbaycandakı səfirliyində tədbir keçirilib.
Əvvəlcə Kəşmir münaqişəsi ilə bağlı qısa film nümayiş olunub. Sonra çıxış edən səfir Səid Xan Mohmand bildirib ki, Kəşmir bizim üçün Dağlıq Qarabağdır: “İki münaqişə arasında bir fərq görmürəm”.
Sonra səfir Pakistan prezidenti Məmnun Hüseynin və baş nazir Şahid Abbasın bu günlə bağlı mesajlarını səsləndirib. Qeyd edib ki, bu münaqişə həll edilməsə regionda sülh və sabitlik olmayacaq. Pakistan münaqişənin beynəlxalq normalar çərçivəsində həlli ilə bağlı verdiyi sözə əməl etməlidir.
Vurğulanıb ki, Hindistan tərəfinin 2016-cı ildən bu yana nümayişlərdə diyircəkli və gözyaşardıcı güllələrdən istifadə etməsi səbəbindən 200-dən çox insan kor edilib, hadisələr zamanı 20 min nəfərdən çox insan yaralanıb: “Biz Hindistanı BMT Təhlükəsizlik Şurasının qətnamələrini yerinə yetirməyə çağırırıq”.
Səfir deyib ki, son iki ildə Hindistan ərazini terror yuvasına çevirib, ərazidə 2016-cı ildən bu yana 200-dən çox dinc kəşmirli öldürülüb, qadınlara qarşı zorakılıq tətbiq edilir: “Bu hadisələri qınayırıq. Pakistan Kəşmir xalqına öz dəstəyini göstərməkdə davam edəcək”.
Diplomat bu məsələdə Pakistana verdiyi dəstəyə görə Azərbaycana təşəkkürünü bildirib.
P.Sultanova
