Erməni məsələsinə gəlincə, Fransa şəhərləri mərkəzi hakimiyyətin qərarlarını qəbul etmir
Mart ayının əvvəllərində Facebook sosial şəbəkəsində Fransanın Alforvil şəhərində çəkilmiş göstərici nişan dərc edilib.
Şəkildə müxtəlif istiqamətlər arasında Azərbaycanın işğal edilmiş Laçın rayonu da yer alıb, lakin ad qismində ermənilərin istifadə etdikləri Bendzor adı qeyd edilib.
“Fransadan xoş xəbər. Şəhərin girişindəki bilbordlarda “Arsax Respublikası”nın bayrağı və Bendzor şəhərinin adı əks olunub”, - deyə “Ədalət və Demokratiya naminə Avropa-erməni Federasiyasının (EAFJD) bəyanatında deyilir.
Paylaşımda o da qeyd olunub ki, göstərici nişanda şəhərin adının qeyd edilməsi “2017-ci ilin noyabrında iki şəhər – Fransanın Alforvil və Qarabağın Bendzor (əsl adı Laçın – red.) şəhərləri arasında dostluq haqqında razılaşmanın imzalanmasının nəticəsidir”.
Həmin vaxt Qarabağ separatçılarının lideri Bako Saakyanın başçılıq etdiyi nümayəndə heyəti Alforvil şəhərində səfərdə olmuşdur.
Fransanın regional hökümət orqanları nümayəndələri və Qarabağ separatçıları arasında dostcasına səfərlər kifayət qədər tez-tez rast gəlinən haldır. Fransanın Dağlıq Qarabağ münaqişəsinin nizamlanması üzrə əsas platforma olan ATƏT-in Minsk qrupunun vasitəçilik missiyasının həmsədri olduğunu nəzərə alsaq, bu fakt xüsusilə heyrət doğurur.
Məsələyə aydınlıq gətirmək üçün 1news.az olaraq, Fransanın Azərbaycandakı səfirliyinə müraciət etdik. Səfirlikdən bildirdilər:
“Bizim mövqeyimiz aydındır: Biz Dağlıq Qarabağı tanımırıq və onun nümayəndələri qismində çıxış edən şəxslərlə əlaqə saxlamırıq. Qeyd etdiyiniz razılaşma heç bir hüquqi qüvvəyə malik deyil və Fransa [dövlət olaraq] ona riayət etmək məcburiyyətində deyil”.
Foto: Fransanın Alforvil şəhərinin girişində göstərici nişan
Səfirlikdən onu da bildirdilər ki, Fransa hökuməti mütəmadi olaraq yerli icra hakimiyyəti orqanlarına tanınmamış qurumların hökumətləri ilə hər hansı razılaşmaların imzalanmasına səlahiyyətlərinin olmamasını xatırladır.
“Fransa hökuməti qaydalara riayət olunması ilə bağlı qanunda nəzərdə tutulmuş bütün tədbirləri həyata keçirir. Fransa Respublikasının prezidenti də qeyd etmişdir ki, ATƏT-in Minsk qrupunun həmsədri olaraq, Fransa öz rolunu qərəzsiz icra etmək niyyətindədir”, - deyə səfirlikdən bildirildi.
Lakin bu qərəzsizliyin nədə ifadə olunduğu qeyri-müəyyəndir, belə ki, sözügedən səhv nişan hələ də Alforvil şəhərində qalmaqdadır və görünür rəsmi Paris bu şəhərin rəhbərliyi qarşısında heç bir hakimiyyətə malik deyil. Xüsusilə də, söhbət ermənilərdən gedirsə...
Yelena Ostapenko
