Vüqar Rəhimzadə: Seçkilərdə vətəndaşlarımız daha güclü Azərbaycan görmək arzusunu ifadə etdilər
Seçkilərin nəticəsindən danşdıqda hesab edirəm ki, bu təkcə İlham Əliyevin gördüyü işlərə yox, bütövlükdə Azərbaycanın inkişafına verilmiş böyük qiymətdir.
Bu barədə 1news.az-a açıqlamasında “İki Sahil” qəzetinin baş redaktoru Vüqar Rəhimzadə aprelin 11-də keçirilən prezident seçkilərini şərh edərkən deyib. Onun sözlərinə görə, bu seçkilərdə vətəndaşlarımız daha güclü Azərbaycan görmək arzusunu ifadə etdilər:
“Onlar ölkəmizdə siyasi sabitliyin qorunub dərinləşməsinə, ümumilikdə cənab Prezidentin 15 il ərzində gördüyü işlərə və onun həyata keçirdiyi Heydər Əliyev siyasətinə dəstək oldular. Bu, təbii haldır. Çünki cənab Prezidentimiz həm daxili, həm də xarici siyasətdə kifayət qədər uğurlara imza atıb. Azərbaycan bu gün dünyanın inkişaf etmiş ölkələrindən birinə çevrilməkdədir. Bu isə təbii ki, Prezidentimizin bütün sahələrdə həyata keçirdiyi çoxşaxəli fəaliyyətinin məntiqi nəticəsidir”.
Vüqar Rəhimzadə İlham Əliyevin prezidentliyə digər namizədlərlə müqayisədə bir sıra üstün keyfiyyətlərə malik olduğunu da qeyd edib: “İlham Əliyevin dövlət başçısı kimi idarəçilik sistemini dərindən bilməsi, dünya siyasətinə dərindən bələd olması onu prezidentliyə digər namizədlərdən fərqləndirir. O, hər zaman xalqa, dövlətə, Vətənə bağlılıq nümunəsi ortaya qoyub. Bu sədaqət nümunəsi, dövlətin inkişafı üçün həyata keçirdiyi siyasət daim Azərbaycanı uğurlara aparıb.
Baş redaktor İlham Əliyevin bundan sonrakı prezidentliyi dövründə də ölkəmizin inkişafı üçün əzmlə çalışacağına və böyük uğurlara imza atacağına əminliyini ifadə edib:
“Prezident namizədliyi irəli sürülən zaman Yeni Azərbaycan Partiyasının qurultayında qarşıda duran hədəfləri geniş qeyd elədi. Təbii ki, Azərbaycanın iqtisadi imkanlarını genişləndirmək, iqtisadi gücünü artırmaq, Azərbaycanın dünya siyasətində rolunu artırmaq və vətəndaşlarımızın həyat şəraitinin davamlı şəkildə yaxşılaşmasına yönəlmiş bir siyasət həyata keçiriləcək. Bu baxımdan hesab edirəm ki, növbəti 7 ildə Azərbaycan daha böyük uğurlara imza atacaq”.
1news.az