Bakıda İsrailin milli bayramı münasibətilə rəsmi qəbul təşkil olunub - FOTO

Mayın 2-də İsrail Dövlətinin Azərbaycandakı səfirliyi ölkəsinin müstəqilliyinin 70-ci ildönümü münasibətilə rəsmi qəbul təşkil edib.

1news.az AZƏRTAC-a istinadən xəbər verir ki, əvvəlcə tədbirdə Azərbaycanın və İsrailin dövlət himnləri səsləndirilib.

İsrailin Azərbaycandakı səfiri Dan Stav çıxış edərək ölkəsinin inkişaf yolundan danışıb, ötən illərdə iqtisadi və mədəni sahələrdə böyük uğurlara nail olunduğunu vurğulayıb.

Səfir İsrail ilə Azərbaycan arasındakı siyasi, iqtisadi, mədəni əlaqələrdən söhbət açıb. O, münasibətlərin inkişafından məmnunluğunu bildirərək deyib ki, qarşılıqlı səfərlər, yüksək səviyyəli görüşlər ikitərəfli əməkdaşlığın daha da inkişafına zəmin yaradır. Diplomat Azərbaycanda yaşayan bütün xalqlar, eləcə də yəhudilər üçün yaradılmış şəraitə və yüksək səviyyəli tolerantlığa görə təşəkkürünü bildirib.

Vergilər naziri Mikayıl Cabbarov əlamətdar gün münasibətilə Azərbaycan hökuməti adından İsrail xalqını təbrik edib. O deyib ki, Azərbaycan ilə İsrail arasında müxtəlif sahələrdə əlaqələr inkişaf edir. Nazir Azərbaycanda yaşayan yəhudi icmasının və İsraildəki Azərbaycan icmasının ölkələrimiz arasında əlaqələrin genişlənməsində böyük rol oynadığını söyləyib. M.Cabbarov əmin olduğunu bildirib ki, ölkələrimiz arasında dostluq münasibətləri getdikcə daha da möhkəmlənəcək.

Tədbirdə rəsmi şəxslər, Milli Məclisin deputatları, xarici ölkələrin Bakıdakı səfirləri, beynəlxalq təşkilatların təmsilçiləri, ictimaiyyətin nümayəndələri iştirak ediblər.

1news.az