118 uşağın “anası” həbs olundu – FOTO
Çinin Hebey vilayətindəki Uan şəhərinin polisi 118 uşağı övladlığa götürmüş Li Lyiszyuanı həbs edib.
1news.az-ın Milli.az-a istinadən verdiyi xəbərə görə, milyonlarla dollar xərcləyərək özəl uşaq evi yaradan və oradakı uşaqlara analıq edən qadın hazırda ifadə edir.
Onun uşaq evi bağlanıb.
L.Lyiszyuan ilk uşağı 1996-cı ildə övladlığa götürmüşdü. Bundan sonra fasiləsiz olaraq kimsəsiz, xəstə uşaqları övladlığa götürən qadın 2007-ci ildə "Məhəbbət kəndi" adlı özəl uşaq evi yaratmışdı.
Sonucda Linin övladlığa götürdüyü uşaqların sayı 118-ə çatmışdı.
Lakin məşhurlaşandan sonra Lyiszyuan xeyriyyəçiliyi varlanma vasitəsinə çevirib.
O, Çinin dövlət büdcəsindən uşaq evi üçün hər ay külli miqdarda pul almaqla yanaşı, dünyanın müxtəlif ölkələrində yaşayan insanlardan böyük məbləğlərdə ianələr qəbul edirdi.
Çinin İstintaq Komitəsi Li Lyiszyuanı övladlığa götürdüyü uşaqlar üçün toplanan maliyyəni mənimsəməkdə, habelə uşaqlardan istifadə edərək yerli məmurları hədələməkdə və şantaj etməkdə suçlayıb.
Bəlli olub ki, uşaq evinin yerləşdiyi binanın altından kabel çəkməli olan şirkətdən L.Lyiszyuan 70 min yuan, otel və hospitaldan isə 320 min yuan alıb.
Uşaq evində isə cəmi 74 uşaq varmış. Yerdə qalan uşaqlar "ölü canlar"dı, yəni onların valideynləri vardı və ailələrdə yaşayırdılar - L.Lyiszyuan hmin uşaqları "övladlığa götürülmüş" kimi rəsmiləşdirib.
Uşaq evində oğurlanmış uşaqların olduğu da istisna edilmir.
1news.az
