Paşinyan: Müharibənin dayandırılması üçün başqa variantlar olsaydı belə, yenə də Şuşanı itirəcəkdik

Ermənistanın baş naziri Nikol Paşinyan Ermənistanın İctimai televiziyasına müsahibə verib.

Müsahibə zamanı Nikol Paşinyan Dağlıq Qarabağda atəşkəs bəyanatının imzalanmasının səbəbləri ilə bağlı sualları cavablandırıb:

“Bu sənəddən imtina etmək üçün bizə heç bir yol qalmayıb. Məsələyə realist yanaşmaq məcburiyyətindəyik. Bu, ortaq bir bəyanatdır, razılaşma və ya müqavilə deyil.

İmzalamasa idim, Xankəndi ələ keçiriləcəkdi və 20-30 min hərbçimiz mühasirəyə alınacaqdı. Qərarı bir neçə saat ərzində verməli idim. Bununla Xankəndi ətrafındakı hərbçilərimizi qorumuş oldum. Bu sənəd müharibəni bitirmək üçün bir sənəddir".

Jurnalistin Şuşa ilə bağlı sualını Paşinyan belə cavablandırıb:

“Şuşanı qaytarmaq üçün iki cəhd etdik, lakin ikisi də uğursuz oldu. Şuşanın itirilməsi ətrafında bir çox mif var. Məsələn, Şuşanın itirilməsini biləndə mənə 50 döyüşçümüzün hələ də orada olduğu barədə məlumat verildi. Məlumat verən şəxslə əlaqə qurmağı xahiş etdim və sonra onun Şuşada deyil də Xankəndidə olduğu məlum oldu”.

“Döyüş meydanında uğursuzluqlardan sonra vəzifəmiz müharibədə dönüş nöqtəsi yaratmaq idi. Şuşanın süqutundan sonra bu tapşırığın mümkünsüz olduğunu müəyyənləşdirdik. Müharibənin dayandırılması üçün başqa variantlar olsaydı belə, yenə də Şuşanı itirəcəkdik”.

S.Xankişiyeva