İqtisadiyyat

Vüqar Bayramov: “Dostluq” yatağı ilə bağlı Memorandum strateji əhəmiyyət daşıyır

17:09 - 21 / 01 / 2021
Vüqar Bayramov: “Dostluq” yatağı ilə bağlı Memorandum strateji əhəmiyyət daşıyır

Xəbər verdiyimiz kimi, 21 yanvar 2021-ci il tarixində Türkmənistanın paytaxtı Aşqabad şəhərində “Azərbaycan Respublikası Hökuməti ilə Türkmənistan Hökuməti arasında Xəzər dənizində “Dostluq” yatağının karbohidrogen resurslarının birgə kəşfiyyatı, işlənməsi və mənimsənilməsi haqqında Anlaşma Memorandumu” imzalanıb.

Azərbaycanın “Kəpəz”, Türkmənistanın isə “Sərdar” adlandırdığı və zəngin neft-qaz ehtiyatlarının olduğu yataq iki ölkənin dəniz sərhədində yerləşir. Bu yataq SSRİ dövründə azərbaycan neftçiləri tərəfindən 4 kilometr dərinliyindəki layda kəşf olunub və 1989-cu ildə orada ilk kəşfiyyat quyusu qazılıb.

Ümumiyyətlə, Xəzər dənizində geologiya-kəşfiyyat işlərinin aparılması, yeni yataqların aşkarlanması bilavasitə Azərbaycan neftçilərinin, geoloqlarının adı ilə bağlıdır. Xoşbəxt Yusifzadə, Qurban Abbasov, Bəhmən Hacıyev və digər neftçilərimiz bu işdə böyük rol oynayıblar.

Bəs görəsən bu Memorandum iki ölkəyə nə verəcək? Bu memorandumun əhəmiyyəti nədir?

Məsələ ilə bağlı 1news.az-a danışan Milli Məclisin deputatı, iqtisadçı Vüqar Bayramov bildirib ki, imzalanmış anlaşma tarixi əhəmiyyət daşıyır:

“Azərbaycanın qaz strategiyasının əsas prioritetləri, hədəfləri məhz Xəzəryanı ölkələr arasında əməkdaşlığın dəstəklənməsindən ibarətdir. Bu, Azərbaycan və Türkmənistan arasındakı strateji əməkdaşlığın inkişafından xəbər verir. Eyni zamanda hər iki ölkə üçün strateji və iqtisadi əhəmiyyəti var. Bu, hər iki ölkənin dövlət gəlirlərinin, eləcə də valyuta gəlirlərinin artmasına imkan yaradacaq. Çünki nəticə etibarı ilə enerji resurslarının hazır edilməsi və dünya bazarına çıxarılması ölkələrin gəlirlərinin artmasına səbəb olacaq".

V.Bayramov bildirib ki, "Dostluq" yatağının resurslarından hər iki ölkə iqtisadi baxımdan faydalanacaq:

“Eyni zamanda bu bir əməkdaşlıq platformasıdır və xüsusən də ikitərəfli müzakirələrin nəticəsi olaraq yatağın birgə işlənməsi ilə bağlı razılığın əldə edilməsi həm də Xəzərin statusu müəyyənləşdişdən sonra formalaşmış əməkdaşlıq platformasının gücləndirilməsindən xəbər verir. Bu baxımdan strateji əhəmiyyət daşıyır.

Azərbaycan həmin yataqda olan enerji resurslarının birgə işlənməsi ilə dünya bazarına çıxarılması nəticəsində dövlət gəlirlərini artırmaq imkanı qazanacaq və tranzit ölkə olaraq mövqeyini gücləndirəcək. Azərbaycanda son 20 ildə formalaşmış infrastruktur imkan verəcək ki, “Dostluq” yatağından hasil olunan neft və qazın dünya bazarına çıxarılması təmin olunsun. Bu eyni zamanda ölkəmizin tranzit ölkə olaraq əhəmiyyətinin artması və gəlir əldə etməsi anlamına gəlir. Bu baxımdan hər iki ölkə üçün strateji əhəmiyyət daşımaqla pozitiv iqtisadi təsirləri olacaq”.

Qafar Ağayev

Son xəbərlər

Bütün xəbərlər

Next TV