AZƏRTAC-ın işğaldan azad edilmiş ərazilərimizdən hazırladığı məqalə TRT radiosunun saytında yerləşdirilib - FOTO
Türkiyənin TRT radiosunun saytı AZƏRTAC-ın “Erməni işğalçılarının viran qoyduğu yurd yerlərimiz” sərlövhəli məqaləsini fotolarla birlikdə yayıb.
Məlumatda təcavüzkar Ermənistanın Azərbaycana qarşı işğalçılıq siyasətinin aradan qaldırılması, müzəffər Ali Baş Komandan İlham Əliyevin rəhbərliyi ilə yenilməz Azərbaycan ordusunun rəşadətli qələbəsi və sonrakı proseslər barədə oxuculara müfəssəl məlumat verilir. Fotoların alt yazılarla təqdim olunması işğaldan azad olunan ərazilərdə törədilən vəhşiliklər barədə əyani təsəvvür yaradır.
Diqqətə çatdırılır ki, Azərbaycan müharibədən sonra erməni işğalçılarının törətdikləri ağlasığmaz vəhşilikləri və dağıntıları sənədləşdirir, videokameranın və fotoobyektivin yaddaşlarına köçürür. Bu işdə fəal iştirak edən AZƏRTAC-ın çəkiliş qrupu bir neçə aydır ki, işğaldan azad olunmuş Ağdam, Cəbrayıl, Füzuli, Zəngilan və Xocavənd rayonlarının ərazilərində çəkilişlər aparır.
Məqalədə bildirilir ki, Azərbaycan dövləti törədilən bu cinayətlərə görə Ermənistanı beynəlxalq ədalət məhkəməsinə vermək niyyətindədir. Ona görə də işğaldan azad edilmiş ərazilərdən toplanan materiallar təkzibolunmaz dəlil-sübut kimi də istifadə edilə bilər.