Türkdilli Ölkələrin Parlament Assambleyasının komissiyalarının iclasları keçirilib | 1news.az | Xəbərlər
Siyasət

Türkdilli Ölkələrin Parlament Assambleyasının komissiyalarının iclasları keçirilib

Qafar Ağayev15:03 - 21 / 09 / 2021
Türkdilli Ölkələrin Parlament Assambleyasının komissiyalarının iclasları keçirilib

Sentyabrın 20-də Türkdilli Ölkələrin Parlament Assambleyasının (TÜRKPA) 10-cu plenar iclası ərəfəsində qurumun dörd komissiyası onlayn iclaslarını keçiriblər.

Milli Məclisin Mətbuat və ictimaiyyətlə əlaqələr şöbəsindən 1news.az-a verilən məlumata görə, parlamentin komitə sədri, TÜRKPA-nın Ətraf mühit və təbii ehtiyatlar komissiyasının sədri Əhliman Əmiraslanov komissiyanın altıncı iclasını açaraq bildirib ki, koronavirusun təsir etdiyi ən önəmli sahələrdən olan ətraf mühitlə bağlı məsələlər TÜRKPA ölkələrində diqqətdə saxlanılır. Komissiya 2020-2021-ci illər ərzində onlayn formatda müxtəlif tədbirlər keçirib, qlobal və regional baxımdan aktual məsələləri deputatların, həmçinin TÜRKPA-ya üzv ölkələrin, beynəlxalq təşkilatların və əlaqədar qurumların ekspertlərinin iştirakı ilə ətraflı müzakirə edib. Bugünkü iclasın gündəliyində yer alan “Su ehtiyatlarının və torpaqların idarə olunması” mövzusuna videokonfrans, “Enerji resurslarından səmərəli istifadə və enerji effektivliyi haqqında model qanun layihəsi”nin müzakirəsinə isə seminarlar həsr olunub.

İclasda adıçəkilən mövzularda məruzələr dinlənilib, müzakirələr aparılıb, tövsiyə qərarlarına baxılıb, bu komissiyanın adının “Ətraf mühit, təbii ehtiyatlar və sağlamlığın qorunması komissiyası” olaraq yenilənməsi məsələsinə müsbət münasibət bildirilib.

Komissiyanın iclasında Milli Məclisin deputatı Sədaqət Vəliyeva da iştirak edib.

X X X

TÜRKPA-nın Hüquq məsələləri və beynəlxalq əlaqələr komissiyasının onlayn formatda keçirilən səkkizinci iclasına komissiyanın sədr müavini Sauıtbek Abdraxmanov (Qazaxıstan) sədrlik edib.

O, əvvəlcə gündəlikdəki “TÜRKPA üzvü ölkələri arasında turizmin inkişafı: COVID-19 pandemiyasının təsiri və gələcək perspektivləri”nə dair komissiya iclasının hesabat məruzəsinin layihəsini, daha sonra isə bu məsələyə dair tövsiyə qərarlarının layihəsini təqdim edərək quruma üzv 4 qardaş ölkə arasında parlament diplomatiyası vasitəsilə görülən işlərdən danışıb. Tarixi birliyimizdən güc alaraq parlamentlərimiz arasındakı əməkdaşlığı inkişaf etdirməyin və milli qanunvericiliyi təkmilləşdirməyin əhəmiyyətini vurğulayıb. Mədəni və humanitar sahələrdə əlaqələrin möhkəmləndirilməsinin səmərəli nəticələr verdiyini bildirib. TÜRKPA ölkələri arasında turizmin inkişafının bütün tərəflər üçün çox faydalı olacağını deyib.

Komissiyanın iclasında TÜRKPA-nın model qanun haqqında Əsasnaməsinin layihəsi, Qadın parlamentariləri qrupunun və Gənc parlamentarilər qrupunun Əsasnamələrinin layihələri müzakirə olunub.

İclasda Milli Məclisin deputatları Cavanşir Feyziyev turizm məsələsi ilə bağlı, Məlahət İbrahimqızı isə Qadın parlamentariləri qrupunun Əsasnaməsi ilə bağlı bir sıra təkliflərini diqqətə çatdırıblar.

X X X

TÜRKPA-nın İqtisadi əməkdaşlıq komissiyasının səkkizinci onlayn iclasına Milli Məclisin deputatları Ağalar Vəliyev və Fazil Mustafa qatılıblar.

İclası açan İqtisadi əməkdaşlıq komissiyasının sədri, Qazaxıstan parlamentinin üzvü Amerxan Raximjanov koronavirus (COVID-19) pandemiyası ilə mübarizədə türkdilli ölkələrin həyata keçirdiyi işləri vurğulamaqla, bu dövrdə TÜRKPA regionunda baş verən önəmli məsələlərdən, xüsusən də 44 günlük Vətən müharibəsində Azərbaycanın Zəfərindən danışıb.

Sonra gündəliyin birinci məsələsi olan “Yaşıl iqtisadiyyat”, yenilik və rəqəmsallaşdırma üçün qanunvericilik dəstəyi təcrübəsinə dair komissiya iclasının hesabat məruzəsinin layihəsi nəzərdən keçirilib. Müzakirələrdə “Yaşıl iqtisadiyyat”, iqtisadiyyatın rəqəmsallaşması və elektron ticarət kimi yeni istiqamətlər müasir dövrün ən mühüm trendləri kimi vurğulanıb və layihə təsdiq edilib.

“Elektron kommersiya haqqında” model qanun layihəsinin müzakirəsində isə sənədin hazırlanmasında Azərbaycan Respublikası Milli Məclisinin işi xüsusi qeyd olunub.

“Yaşıl iqtisadiyyat”, yenilik və rəqəmsallaşdırma üçün qanunvericilik dəstəyi təcrübəsinə dair Komissiya iclasının tövsiyə qərarlarının layihəsi də komissiyanın müzakirəsindən keçərək qəbul olunub.

Milli Məclisin deputatları Ağalar Vəliyev və Fazil Mustafa iclasda müzakirə olunan məsələlərlə bağlı çıxış edərək müasir çağırışlar fonunda layihələrin əhəmiyyətini yüksək dəyərləndirib, “Yaşıl iqtisadiyyat” və rəqəmsallaşdırma üzrə Azərbaycanın gördüyü işləri, xüsusən işğaldan azad edilmiş ərazilərdə dövlətimizin bu istiqamətdə həyata keçirdiyi tədbirləri qeyd ediblər.

X X X

TÜRKPA-nın Sosial, mədəni və humanitar məsələlər komissiyasının onlayn səkkizinci iclasını komissiya sədrinin müavini, Milli Məclisin deputatı Nizami Cəfərov aparıb.

Gündəliyin qəbulundan sonra “Pandemiya şəraitində TÜRKPA üzvü ölkələrinin kənd ərazilərində sosial vəziyyətə dair” hesabat məruzəsinin layihəsi müzakirə olunub. Nizami Cəfərov layihə barədə məlumat verərək pandemiya dövründə ölkələrdə, xüsusən kənd ərazilərində meydana çıxan və kəskinləşən sosial problemlərin həllində gənc fermerlərin və qadın sahibkarlığının stimullaşdırılmasının vacibliyini vurğulayıb. Müzakirələrdən sonra Türkiyə tərəfinin təklifi nəzərə alınmaqla “Pandemiya şəraitində TÜRKPA üzvü ölkələrinin kənd ərazilərində sosial vəziyyət”ə dair hesabat məruzəsi təsdiqlənib və məruzəni plenar iclasda təqdim etmək Milli Məclisin deputatı Nizami Cəfərova həvalə olunub.

Sonra “Kinematoqrafiya haqqında” və “Kinematoqrafiya və audiovizual əsərlərin çəkilişinə xarici investisiyaların cəlb edilməsi haqqında” model qanun layihələri müzakirə olunub. Qanun layihələrini Milli Məclis Aparatının Sosial qanunvericilik şöbəsinin müdiri Adil Vəliyev təqdim edib. Bildirilib ki, qanun layihələrində TÜRKPA arealında filmlərin istehsalı, yayımlanması, kinematoqrafiya sənətinin təbliği və qorunması, habelə gənclərin bu sahədə yaradıcılığının inkişaf etdirilməsi üçün müxtəlif stimullaşdırıcı tədbirlərin təşkili, eyni zamanda, kinematoqrafiyanın inkişafı üçün olduqca vacib olan xarici maliyyə vəsaitlərinin cəlbi nəzərdə tutulub. Parlamentarilər qanun layihələrini qəbul edəndən sonra gündəliyin üçüncü məsələsi olan “Pandemiya şəraitində TÜRKPA üzvü ölkələrinin kənd ərazilərində sosial vəziyyətə dair” komissiya iclasının tövsiyə qərarlarının layihəsini də müzakirə edərək təsdiqləyiblər.

Onlayn formatda keçirilən bütün komissiyaların iclaslarında təşkilati məsələlərə baxılıb. Növbəti seminarların mövzuları, həmçinin növbəti iclasların yeri, tarixi və gündəliyi müəyyənləşdirilib.

Paylaş:
90

Son xəbərlər

Sevinc Fətəliyeva: «Hər hansı bir təxribat cəhdi Ermənistan üçün “bumeranq effekti” verəcəkdir»Bu gün, 19:21Azərbaycan və Ukraynanın gənclər təşkilatları birgə memorandum imzaladılar - FOTOBu gün, 19:10Dolların oktyabrın 25-nə olan rəsmi məzənnəsi açıqlanıbBu gün, 18:21“Karabakh Center” “Rebuild Karabakh” sərgisində - Qarabağda törədilən erməni vandallığı ilə nümayiş olundu - FOTOBu gün, 17:54Fil balasını yemək istəyən timsahı öldürdü - VİDEOBu gün, 17:50Şəhid, Vətən Müharibəsi qəhrəmanı polkovnik leytenant Qasımov Ramizin xatirə gecəsi keçirilib - FOTOBu gün, 17:39Naxçıvanın turizm potensialı mediatur çərçivəsində nümayiş olunub - FOTOBu gün, 17:36Azərbaycan-İran sərhədinin azad olunan hissəsində aşkarlanan minaların sayı açıqlanıb - FOTOBu gün, 17:14Sumqayıtda peyvənd olunmayan taksi sürücüləri cərimələnib – FOTO – VİDEOBu gün, 16:50Azərbaycana xüsusi təlim keçmiş iki minaaxtaran it gətirilibBu gün, 16:38Azad olunan rayonlarda yeni inşa edilən hərbi obyektlər istifadəyə – FOTO – VİDEOBu gün, 16:26Prezident İlham Əliyev Macarıstanın dövlət başçısını təbrik edibBu gün, 15:51"Bizim olanı sülhlə istədik, alınmadı silahla aldıq"-Deputat Prezidentin tarixi səfərlərindən danışdıBu gün, 15:43“Şuşa Zülmətdən İşığa” - “Azərişıq” filmi hazırladı - VİDEOBu gün, 15:38Bakı sakinləri eyvanlarından Prezident İlham Əliyev və birinci xanımı salamlayıblar – FOTOBu gün, 15:32Ağdam Dram Teatrının və Füzulidəki “Araz” nəşriyyatının binaları konservasiya olunacaqBu gün, 15:17Bakıda DOST İnklüziv İnkişaf və Yaradıcılıq Mərkəzinin açılışı olub – FOTO – YENİLƏNİBBu gün, 15:11Ərdoğan: Türk dünyası beynəlxalq medianın ikili standartından da əziyyət çəkirBu gün, 15:09Şəhidlərimiz Azərbaycanın qəhrəmanlıq tarixini yenidən yazdılar - Şəhid Xudayarın anasıBu gün, 14:30Prezident və xanımı Milli Gimnastika Arenasının yeni məşq binasında yaradılan şəraitlə tanış olublar – FOTO – YENİLƏNİBBu gün, 14:22
Bütün xəbərlər

Next TV