“Qərbin anti-Azərbaycan şəbəkələri daim məqam gözləyir” – Tural İsmayılov
“Mediada Qərbdən yeni informasiya hücumları olacağı ilə bağlı yayılan informasiya narahaedicidir”.
Bu fikirləri 1news.az-a açıqlamasında politoloq Tural İsmayılov bildirib:
“KİV iddia edir ki, Vətən Müharibəsində tarixi Qələbənin birinci ildönümü ərəfəsində Azərbaycanın dövlət siyasəti, ölkədə mövcud durum və hakimiyyətdə təmsil olunmuş müxtəlif yüksək vəzifəli şəxslərə qarşı müəyyən dairələr ünvanlı qarayaxma kampaniyasına başlamaq niyyətindədirlər. Ümumiyyətlə, ölkəmizin qazandığı tarixi qələbə fonunda erməni lobbisinin təsirində olan müəyyən qüvvələrin fəallaşmağı gözləniləndir. Azərbaycan hazırda regional güc mərkəzidir, bu isə müəyyən qüvvələri ciddi formada narahat edir. Qərbin müəyyən dairələrinin və onların təsiri altında olan media və QHT-lərin, ekspertlərin bu tipli hücumları əvvəlki illərdə də müşahidə olunub.
Hər dəfə Azərbaycanla bağlı mühüm məsələlər gündəlikdə duranda və ya Azərbaycanda beynəlxalq ictimaiyyətin diqqətini cəlb edəcək tədbirlər keçiriləndə (Eurovision 2012, Avropa Oyunları, İslam Həmrəyliyi Oyunları, mühüm enerji və iqtisadi layihlər, beynəlxalq siyasi, iqtisadi, mədəni tədbirlər) bu tipli hücumlar və qarayaxma kampaniyaları təşkil olunur. İndi də Vətən Müharibəsinin 1 illiyi yaxınlaşır. Ölkədəki yüksək vətənpərvərlik, xalq-iqtidar birliyinin yüksək səviyyədə olmağı reallıqdır. Erməni yedəyində olanlar dezinformasiya hücumları hazırlamaq üçün müxtəlif dövrlərdə təliamtlar alırlar.
Qərb dairələri Azərbaycanın müharibədə qələbəsini həzm edə bilmirlər və sülh prosesinə zərbə vurmağa çalışırlar. Almaniya və ABŞ mediasında son zamanlar təşkil olunan ünvanlı qarayaxma kampaniyalarının əsas məqsədi də budur. Almaniya mediasının hansı qüvvələrə xidmət etməyi ilə bağlı geniş təhlillərimiz çox olub. Həmin dairələr qondarma problemləri ortaya atır, onun beynəlxalq miqyasda müzakirəsini təşkil etməyə, mövzunu Azərbaycanın informasiya məkanına keçirtməyə çalışırlar. Azərbaycan ictimaiyyəti, mediası belə məsələlərdə həssas olmalı, bu tipli kampaniyaları təşkil edənlərə və daxildə ondan yararlanmağa çalışanları meydan verməməli və öz qəti sözünü deməlidir”.
Politoloq qeyd edib ki, Qərb imperializminin olduğu hər yerdə anarxiya, xaos və xalqların göz yaşları var, Azərbaycanda isə güclü siyasi iradə mövcud olduğu üçün növbəti kampaniya da fiaskoya məhkumdur.
1news.az
