Daxili Qoşunların şəhid olmuş hərbi qulluqçusunun xatirəsi yad edilib – FOTO
Torpaqlarımızın düşmən işğalından azad edilməsi uğrunda gedən Vətən müharibəsində qəhrəmancasına döyüşərək şəhidlik zirvəsinə ucalmış DİN-in Daxili Qoşunlarının hərbi qulluqçusu, çavuş Həsən Aydın oğlu Abdullayevin bu gün İsmayıllıda il mərasimi keçirilib.
Mərasimdə DİN-in Baş Əməliyyat və Statistik İnformasiya İdarəsinin rəisi, polis polkovniki Namiq Həsənov, İsmayıllı Rayon Polis Şöbəsinin rəisi Şəmşir Kazımov və şöbənin şəxsi heyəti, Daxili Qoşunların hərbi qulluqçuları, rayon rəhbərliyi, şəhidin ailə üzvləri, döyüş yoldaşları və ictimaiyyət nümayəndələri iştirak ediblər.
Bu barədə Daxili İşlər Nazirliyinin mətbuat xidmətinin Şəki regional qrupundan 1news.az-a verilən məlumatda bildirilir ki, əvvəlcə şəhid H.Abdullayevin rayonunun Quşencə kənd qəbiristanlığındakı məzarı ziyarət olunub, önünə çiçək dəstələri düzülüb, ruhuna dualar oxunub. Şəhidin keçdiyi döyüş yolundan, Vətən müharibəsindəki rəşadətindən bəhs edilib, xatirəsinin qəlblərdə əbədi yaşayacağı vurğulanıb.
Qeyd edək ki, əslən Kəlbəcər rayonundan olan H.Abdullayev Murovdağ istiqamətində gedən döyüşlərdə şəhidlik zirvəsinə ucalıb və ölümündən sonra Prezidentin müvafiq sərəncamları ilə “Vətən uğrunda”, “Kəlbəcərin azad olunmasına görə” medalları ilə təltif edilib.
