Qazaxıstanın paytaxtında fövqəladə vəziyyət tətbiq olunub

Qazaxıstanın paytaxtı Nur-Sultan şəhərində fövqəladə vəziyyət rejimi tətbiq edilib.

1news.az Qazaxıstan KİV-lərinə istinadən xəbər verir ki, fövqəladə vəziyyət rejimi bu gün saat 16:00-dan yanvarın 19-na qədər davam edəcək. Bu müddət ərzində axşam saat 23:00-dan səhər saat 7:00-a qədər komendant saatı olacaq.

Qeyd edək ki, Qazaxıstanda maye qazın bahalaşmasına etiraz olaraq aksiyalar keçirilir. Aksiyalarda 100-ə qədər polis əməkdaşı xəsarət alıb, 200-dən çox şəxs saxlanılıb. Prezident Kasım-Jomart Tokayev hökuməti istefaya göndərib. Almatı və Mangistau vilayətlərində də fövqəladə vəziyyət elan edilib.